Aajuna misileraanermi ilitsersuut

Qeqertarsuup Tunuani umiatsiaararsortut misileraallutik qaleralinniarnissaannut Naalakkersuisut sapaatip akunnerani kingullermi akuersissutigivaat. Qaleralinniarfigisinnaasaat Qeqertarsuup Tunuata kippasissortaaniillutik.

Misileraalluni qalerallit 500 tonsit aalisarneqassapput, juulimi 250 tonsit aggustimilu aamma taama amerlatigisut.

Misileraalluni aalisarneq umiatsiaararsortunit aqutsiveqarfimmi Qeqertarsuup Tunuani, Uummannami Upernavimmilu aalisarsinnaanermut akuersissutilinnit peqataaffigineqarsinnaavoq, taakkuli Ilulissani, Qeqertarsuarmi, Qasigiannguani, Aasianni Kangaatsiamilu najugaqartuussapput.

Ilitsersuut:

Aalisakkanik uuttortaaneq
Uuttortaanermi qisuk uuttortaavik (målebræt) atorneqassaaq. Ajornarpat uuttuut (målebånd) nerrivimmut, bænkimut arlaannulluunniit ikkunneqarsinnaavoq.
Uuttortaanermi ataatsimi (måleprøveq ataaseq) aalisakkat ikinnerpaamik 150-iussapput.

Kilisaammi
- Immikkoortiterivik (båndi) unitseriarlugit aalisakkat 50-it tiguneqassapput. aalisakkat minnerit allinngorajupput, taamaammallu båndi unitsinngikkaanni ilanngunneqanngitsoorsinnaallutik, uuttortaanerlu tutsuiginarunnaarluni.
- Båndit ingerlateqqikkallarlugit
- Unitseqqeriarlugit siulianisut aalisakkat 50-it tiguneqassapput
- Båndi ingerlateqqeriarlugu aamma 50-it tiguneqassapput

Ningittagarsuummi qassusersornermiluunniit
- Amusinermi ataatsimi pisat tamakkerlugit uuttortarneqassapput, aalisakkalli 150-it sinningaatsiapatigit qaqinneqartut siulliit ikinnerpaamik 150-it uuttortarneqassapput.

Sigguisa nuuiniit paperuata nuuanut uuttortarneqassapput (TTL), uuttortaanerit tamarmik skemanut immersorneqartarput, ulloq sumiissuseq (position) itissuserlu ilanngullugit allattorneqassallutik. Aamma ilanngullugu allanneqassapput tamatigut, suut atorlugit pisarineqarsimanersut.

Nalunngikkukku pisarisimasat ataatsimut oqimaassusaat uuttortagassallu immikkoortitat oqimaassusaat allanneqassapput.

Uuttortaaviit skemallu nunamut pinermi Pinngortitaleriffimmut nassiunneqartassapput.
Nalornisoornermi tamatigut, minnerpaamillu qaammammut ataasiarluta attavigineqartarnissarput kissaatiginassaaq.

Ilitsersuut Pinngortitaleriffimmit suliarineqarpoq.

Attavigineqarsinnaavoq: Emanuel Rosing, Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq. E-mail: emanuel@nanoq.gl