Sukkasuumik suliniarnissaq Uuliakoortoqartillugu aalajangiisuulluinnartumik pingaaruteqarpoq

Kalaallisut filmiliaq atuartitsissutaasussaq nutaaq upalungaarsimanermi sulisunut siunnerfeqartinneqartoq, imaani uuliakoortoqartillugu upalungaarsimanermi sulisut sukkasuumik pikkorissuseqartumillu suliniartarnissaannik qulakkeereqataassaaq.

Ukiut tamarluinnaasa Kalaallit Nunaanni sinerissap qanittuani imaani avatangiisini uuliakoornermik pisoqartarpoq. Uulia uumasunut aamma imaani avatangiisinut ajoqusiisumik sunniisarmat uuliakoornermik pisoqarnera ilungersunartuusarpoq. Taamaattumik imaani uuliakoornermik pisoqartillugu uuliap siaruannginnerani sukkasuumik katersorneqartarnissaa pingaaruteqarpoq

”Ajutoorneq pereerpat aammalu imaani uuliakoortoqarluni, sikuntit pingaaruteqarput. Najukkami upalungaarsimanermi sulisut sukkasuumik pikkorissuseqartumillu suliniarnissamut piareersimanissaat pingaaruteqartorujussuuvoq. Uuliakoornissamut upalungaarsimanermi atortut nunatsinni assigiinngitsuni inissisimatitatta atornissaat nalornisigissanngilaat” oqarpoq Avatangiisinut Pinngortitamullu Naalakkersuisoq Kim Kielsen.

Avatangiisinut Pinngortitamullu Naalakkersuisoq Kim Kielsen atuartitsissutaasussamik nutaamik filmiliortitsisuuvoq. Sinerissap qanittuani uuliakoornissamut upalungaarsimanermi atortut qanoq atorneqassanersut aserfallatsaaliorneqassanersullu filmiliami takutinneqarpoq.

”Filmiliaq soorunami piviusumik sungiusartarnernut taartaasinnaanngilaq, kisianni sulisut ilinniartinneqarnerannut ilaassaaq”, oqarpoq Avatangiisinut Pinngortitamullu Naalakkersuisoq Kim Kielsen.

Avatangiisinut Pinngortitamullu Naalakkersuisoqarfik Kalaallit Nunaata imartaani uuliakoornissamut upalungaarsimanermut akisussaasuuvoq. Uuliakoornissamut upalungaarsimanermi sulisut atortullu Kalaallit Nunaanni illoqarfinni 12-ini qatserisarfinni inissisimasut aallaaviupput. Sulisut sungiusimasaat allanngutsaaliorniarlugit nunatsinni sumiiffinni assigiinngitsuni sungiusartitsisoqartarpoq, taamaalilluni ajutoornermik pisoqarnerani upalungaarsimasut suliniarnissamut tamatigut piareersimassallutik.

Assip oqaasertai: Avatangiisinut Pinngortitamullu Naalakkersuisoqarfik qanittumi Qaqortumi upalungaarsimanermi sungiusartitsivoq. Uani upalungaarsimanermi sulisut sungiusareernerup kingorna katersuupput (Assiliisoq: Jeppe Bender Jørgensen).