Aleqap ICC-p ataatsimeersuarnerani oqalugiaataa

Naalakkersuisut Siulittaasuat Aleqa Hammond ICC-p aqqaneq aappassaanik ataatsimeersuarnerani Canadami Inuvimmi nal. 16 oqalugiarpoq (nunatsinni nal. 20.00).

Oqalugiaammini inunnit isumalluutit ilaatigut eqqartorpai, taakku Namminersornerullutik Oqartussaqalerneranit maannamut ilinniartitaanikkut ineriartorsimallutik.

- Isumaqarpunga uagut Inuit siunissarput isigitillugu ornitsillugulu kingumut qiviarnitsinni torrallatavut nakooqutigalugu namminerlu ilinniarfigisimasagut atorlugit ingerlariaqqittuassasugut, Aleqa Hammond oqalugiaammini ilaatigut oqarpoq, oqalugiaammi meeqqat atuartitaanerat inuusuttullu ilinniarfiisa pitsanngorsartuartariaqarnerat aamma sammineqarluni.

Inunnit isumalluutit saniatigut pinngortitami isumalluutit aamma sammineqarput, uumassusillit aamma aatsitassat ikummatissallu. Tassani nungusaataanngitsumik atuinissaq qulakkeerniarlugu aqutsinerup qanoq pingaaruteqartiginera aamma suliffissat ineriartornerlu qulakkeerniarlugit inuiaqatigiit ilaatigut aatsitassanit aningaasarsiulernissamik pisariaqartitsinerat aamma erseqqissarpaa.

Nunarsuarmioqatitsinnik attaveqarneq Aleqa Hammondip naggataatigut aamma oqaaseqarfigaa, inuiaqatigiit Inuit silaannaap kissatsikkiartorneranit, aatsitassarsiornermit ikummatissarsiornermillu, innuttaasut ineriartorneranit avataaniillu Issittup soqutigineqaleriartuinnarneranit tatisimaneqarnerat oqaatigalugu.

Oqalugiaat kalaallisooq uani atuarsinnaavat.
Tuluttuua uani atuarsinnaavat.