Kujataani aqqusineq nutaaq

Nunatta Kujataani aqqusiniliornissamik Naalakkersuisut qinnuteqaataat akuerineqarpoq. Inatsisartut Aningaasaqarnermut Akileraartarnermullu Ataatsimiititaliaata Nunatta Kujataani aqqusiniliortoqarnissaanik Naalakkersuisut qinnuteqaataat akuereqqammerpaat.

Ineqarnermut Naalakkersuisoq, Siverth K. Heilmann, Inuussutissarsiutinut Aatsitassanullu Naalakkersuisoq, Jens-Erik Kirkegaard aammalu Peqqissutsimut Attaveqarnermullu Naalakkersuisoq, Steen Lynge aningaasaliissutinik 20,025 mio. kr.-inik qinnuteqarput 6 km-mik isorartussusilimmik Qaqortumiit aallaavilimmik aqqusiniliortoqarnissaa, illoqarfiup suli annertunerusumik ineriartortinneqarnissaanut periarfissat annerulersinneqarnissaat siunertaralugu.

Qinnuteqaat, maanna akuersaarneqarsimalersoq aallaaveqarpoq Kommune Kujallermit Naalakkersuisunut saaffiginnissuteqartoqarnikuummat suliniummut suliffissat amerlanerusut pilertortumik pilersinneqarnissaannik siunertaqartumut Naalakkersuisut taperseeqqullugit. Maajip qaammataani 2014-mi Kommune Kujallermi suliffissaaleqisutut nalunaarsorneqarsimasut 521-iupput. Piffissami matumani suliffissaaleqinermik eqqugaasimasut 11 procentit missaannik annertussuseqarput, nuna tamakkerlugu suliffissaaleqisutut nalunaarsorneqarsimasut ataatsimut isigissagaanni Kommune suliffissaaleqiffiusutut qaffasingaatsiartumik inissisimavoq.

Qaqortumit aallartittumik aqqusinermik 6 km-itut isorartutigisumik sanaartortoqalerneratigut nalilerneqarpoq suliffissanik pilersitsineq annertungaatsiassasoq, nunagissaalluni beton-ilerillunilu sulinermi, matumani suliassaq annertunerpaatigut taamaassammat, atortussanik avataaniit pissarsiniartariaqarneq annikitsuinnaassammat (qaartiterutit aammalu cementi) suliassat sinneri sumiiffimmi suliarineqartussaallutik.

Kommune Kujalleq erseqqissaateqarpoq, suliap ingerlanneqarnerani suliffissaaleqinermik eqqugaasimasut suliassaqartinneqarnissaat ilinniartullu ilinniaatigalutik sulisinneqarnissaat pingaartinneqassasoq, soorluttaaq pikkorissaanerit ingerlanneqassasut, siunissami suliassani annertuuni suleqataalerumaartussat piginnaasaasa annertusarneqarnissaat siunertarineqarluni.

Sukumiinerusumik paasisaqarusukkaanni Naalakkersuisup allattaanut Jensine Berthelsen-imut saaffiginnittoqarsinnaavoq, tlf. nr. 56 23 03-mut imaluunniit e-mail jebe@nanoq.gl .–mut saaffiginnilluni.