Sermitsiaq.AG-p taperneqarnissamut itigartinneqarneranut tunngatillugu naqqiut

Naalakkersuisut qinnuteqaammut itigartitsillutik nutaarsiassaqartitsivimmut 9. juli 2014 allakkaminni nutaarsiassaqartitsivik Sermitsiaq.AG erseqqissaavigineqarpoq qinnuteqarnissamut 8. januar 2014 killissarititaasoq qaammat sinnerlugu qaangerneqarsimammat, qinnuteqaammi  11. februar 2014 aatsaat tiguneqarpoq.

Aningaasanut Inatsimmi kontomi annermi ”10.06.24 Nuna tamakkerlugu aviisinut tapiissut” allassimavoq qinnuteqaat kingusinnerpaamik 8. januar 2014 tunniunneqassasoq. Taamaammat ilumuunngilaq nutaarsiassaqartitsiviit allammata qinnuteqaat piffissaq eqqorlugu nassiunneqarsimasoq.

Itigartitsissummi Naalakkersuisut tunngavilersuutigaat, Sermitsiaq.AG-p aningaasaqarneranik naliliinerup saniatigut, qinnuteqaat piffissaq eqqorlugu tunniunneqarsimanngimmat.

Sermitsiaq.AG-p qinnuteqaataanut Naalakkersuisut itigartitsillutik allagaqaataat ataani atuarneqarsinnaavoq.

Sermitsiaq.AG-mut allagaq