IBAmik isumaqatigiissut tamanit takuneqarsinnaavoq

Sunniutissat iluaqutissallu pillugit isumaqatigiissut (IBA) True North Gems Greenlandimit, Namminersorlutik Oqartussanit aamma Kommuneqarfik Sermersuumit Qeqertarsuatsiaani junip 16.-anni 2014-imi atsioqatigiissutigineqartoq, tamanit takuneqarsinnaasunngorlugu www.naalakkersuisut.gl -imut naqitat akornannut ikkunneqarpoq. Isumaqatigiissut tuluttut aamma kalaallisut atuarneqarsinnaavoq.

Sunniutissat iluaqutissallu pillugit isumaqatigiissummi rubinimik piiaavissamik suliniutip pitsaanerpaamik sunniuteqarnissaa pitsaanngitsunillu sunniuteqartinnaveersaarnissaa anguniarneqarput, taamaalilluni inuiaqatigiinnut, aningaasaqarnikkut aamma avatangiiisitigut piujuartitsisumik Kalaallit Nunaanni piiaaveqalernissaa qulakkeerniarneqarluni.

Sulisartut kalaallit sulisorineqarnissaat isumaqatigiissummi qitiutilluinnarneqarput. True North Gems Greenlandimit ersarissumik nalunaarutigineqarpoq, sulisartut aatsitassanik piiaavimmi sulisorineqartussatut pisariaqartinneqartut 75%ii kalaaliussasut. Tamatumalu saniatigut tallimanik ilinniartuuteqartuassallutik.

Suliffeqarfik Sunniutissat Iluaqutissallu pillugit Isumaqatigiissut naapertorlugu ilinniartitaanermut piginnaanngorsaanermullu tunngasunut aningaasanik immikkoortitsissarnissaminut pisussaaffeqarpoq.

Suliffeqarfiup ukiuni 2014imi aamma 2015imi aningaasat 250.000 DDK ilinniartitsinermut aningaasaateqarfimmut immikkoortissavai, tassani sulisartut ilinniagaqarsimasut ilinniagaqarsimanngitsullu aatsitassarsiornermut tunngasuni suliffinnik soqutigisaqartut pikkorissarneqarnissaat qulakkeerniassallugu. True North Gems Greenlandillu 2016-imiit aatsitassarsiorfiup matuneqarnissaata tungaanut ilinniartitsinermut aningaasateqarfimmut ukiumut 1.mio. DDK immikkoortittassavai.

Inuussutissarsiornermut Aatsitassanullu Naalakkersuisup Jens-Erik Kirkegaardip Qeqertarsuatsiaani Sunniutissat Iluaqutissallu pillugit Isumaqatigiissummik atsioqatigiinnermut atatillugu oqalugiaateqarnermini suleqatigiinnissamik isumaqatigiissutip suliniut najugaqarfimmut pituttuinissaanik isumannaareqataassasoq oqaatigaa, imalu nangilluni: ‘Isumaqarpunga ingerlatseqatigiiffik, Kommune Namminersortullu sinnerlugit oqarsinnaallunga assut iluarinartumik isumaqatigiissuteqarsimasugut, Kalaallit Nunaannut annertuumik iluaqutaasussamik, minnerunngitsumillu Qeqertarsuatsiaani innuttaasunut. Taassuma aamma nuannaarutigaa, suliniut Kalaallit inooqatigiinnermi kulturikkullu aaqqissuussanik naleqartitaannik inissaqartitsimmat.

Inooqatigiinnermut kultureqarnermullu aningaasaateqarfik pilersinneqarpoq, ukiumi matumani ukiullu tulliani 100.000 DKK-inik True North Gemsimit ikisiffigineqartussaq. Ukiumut aningaasaliissutaasartut 2016-imiit aatsitassarsiorfiup matuneqarnissaata tungaanut 250.000 kroneusassapput.

Sunniutissat Iluaqutissallu pillugit isumaqatigiissuteqarnermi nunaqarfimmi silisinermut atortorissaarutit pilersinneqaqqissapput, aamma pinnersaasiassanik agguinermik silisinermillu pikkorissaanerit aaqqissuunneqassapput.

Annerusumik paasisaqarusukkaanni attavissaq:

Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmi paasissutissiisartoq
Oline Inuusuttoq Olsen E-mail:oiol@nanoq.gl oqarasuaat: +299 34 56 56