Ilinniartut ineqarfiinut tunngatillugu Nuummiut assigiinngisinneqanngillat

Ilinniagaqarniartut arlallit Nuummi najugaqartut Nuummi ilinniartut ineqarfiinik tunineqannginnerannut atatillugu borgmesteri Asii Chemnitz Naarup Sermitsiaq.gl-mut imatut oqaaseqaateqarpoq: “Namminersorlutik Oqartussat Nuummiunik assigiinngisitsinerisa tamanna ilagaat. Kikkut tamarmik ilinniartut ineqarfiinik qularnaariffigineqarput, Nuummeersut kisiisa pinnagit”.

Assigiinngisitsinermik pasilliuteqarneq ilungersunartuummat, Naalakkersuisoqarfik isumaqarpoq, ilinniartut inaannik tunniussisarnermut malittarisassat erseqqinnerusumik nassuiartariaqarlugit.

Illoqarfinnut tamanut Namminersorlutik Oqartussat ilinniartunut ineqarfiusunut Ilinniartut ineqarfii pillugit nalunaarummi aalajangersarneqarpoq, ilinniartut avataaneersut ilinniartut ineqarfiinik tunniussinermi salliutinneqarnerussasut. Nuummiinnaanngitsoq, tamanna isumaqarpoq aamma illoqarfinni ilinniarfiusuni arlaqartuni, inissiat innersuunneqarsinnaasut imarisinnaasaat akuttunngitsumik ilinniartunut avataaneersunut taamaallaat naammattarput. Tassalu agguaasseriaaseq Nuummi atorneqartoq kisimi pineqanngilaq, kisianni nuna tamakkerlugu suleriaaseq atuuttoq aamma ilinniartut ineqarfii pillugit nalunaarummi akuerisaasoq tunngavigalugu.

 

Tamanna tunuliaqutaralugu “Nuummiunik” assigiinngisitsernermik oqalunneq erseqqissumik tunuartinneqartariaqarpoq. Nuummiut illoqarfinni allani ilinniarnermut atatillugu ilinniartunut ineqarfinni Nuummit salliutineqarnerujussuupput – taamatullu innuttaasut Nuup avataaneersut Nuummeersunit ilinniarnissamut atatillugu ilinniartunut inissiani salliutinneqarnerujussuusarput.

 

Paasisaqarnerorusuttut attavisiginnaavaat Naalakkersuisoqarfimmi pisortaq Mikael Kristensen, oqarasuaammut 345620, imaluunniit e-mail mkri@nanoq.gl.