Saammaateqatigiinnissamut Isumalioqatigiissitaq maanna piviusunngortinneqarpoq

Naalakkersuisut Saammaateqatigiinnissamut Isumalioqatigiissitamut ilaasortassanik maanna toqqaapput.

”Naalakkersuisut isumalioqatigiissitamik tamatigoortumik ilinniakkatigut assigiinngitsunik inuiaqatigiinnullu tunngassuteqartunut piginnaasaqartunik pilersitsisoqarnissaa pimoorussimavaat, kiisalu nuimasunik inuttut piumassusilinnik misilittakkanillu tunuliaqutaqartunik toqqaasimallutik, isumalioqatigiissitat sulinerannut ajunngitsumik sunniuteqartussanik.

Isumalioqatigiissitaliamut soqutiginnittorpassuaqarpoq piginnaasalinnillu arlalinnik qinigassanngortittoqarluni, isumaqarpugullu, taamatut ilaasortalersuinermi Saammaateqatigiinnissamut Isumalioqatigiissitami sulinerup aqunneqarnissaanut ilaasortanik eqqortunik ilaasortanngortitaqarsimalluta.

Naalakkersuisut sinnerlugit isumalioqatigiissitaliaq tikilluaqqorusuppara. Maanna isumalioqatigiissitaliaq pingaarutilinnik pimoorussinissaat qilanaaraarput,” taama oqaaseqarpoq Aleqa Hammond.

Isumalioqatigiissitalianut ilaasortassatut toqqarneqartut tassaapput: Karla Jessen Williamson, antropologimi doktoriusoq, Klaus Georg Hansen, etnografiimi cand. mag.-iusoq, Amalia Lynge Pedersen, cand. psych.-iusoq, Jens Heinrich, kulturikkut oqaluttuarisaanermi Ph.d.-usoq, Aviâja Egede Lynge, cand. scient.-iusoq aamma Ida Mathiassen, ilinniartitsisoq nalinginnaasumillu perorsaasarnermi cand. scient.-iusoq.

Isumalioqatigiissitaliaq Kalaallit Nunaanni saammaateqatigiinnissamut iliuuseqartarnissanut pilersitsisussaq, sulinissartik aggustimi aallartissavaat. Tamatumani isumalioqatigiissitaliaq siullerpaamik workshopernerup nalaani naapeqatigeeqqaalerput. Tassanilu workshopernerminni suliassat aaqqissuullugit aallartisassallugit.

Naalakkersuisut isumalioqatigiissitaliami sulinissamut piareersarnerminni Inatsisartuni naalakkersuinikkut partiit tamaasa attaveqarfigaat. Naalakkersuisut partiit peqquaat malitseqartitsinissamut suleqatigiissitaliamut ilaasortassanik toqqagaqassasut. Saammaateqatigiinnissamut Isumalioqatigiissitamut malitseqartitsinissamut suleqatigiissitalianut ukua ilaasortaapput: Gerhardt Petersen (A), Sara Olsvig (IA), Hanne Rasmussen (D), Paninnguaq Olsen (PI), Per Rosing-Petersen (PN) aamma Kenneth Rasmussen (S).

Ataani pineqartut pillugit paasisaqarnerugit:

Suliassat
Isumalioqatigiissitami ilaasortat
Malitseqartitsinissamut suleqatigiissitami ilaasortat