Qeqertarsuup Tunuani misileraalluni qaleralinniartoqassaaq

Qeqertarsuup Tunuani umiatsiaararsortut misileraallutik qaleralinniarsinnaasut Naalakkersuisut akuersissutigivaat. Qaleralinniarfigisinnaasaat Qeqertarsuup Tunuata kippasissortaaniipput.

Naalakkersuisut umiatsiaararsortut 2013-mi misileraallutik qaleralinniarsinnaanerat akuersissutigaat.

Pilersaarutilli naapertorlugit misileraasoqanngilaq, misileraanermi qaleralittassiissutigineqartut nalinginnaasumik ukiakkut qaleralittassiissutigineqarmata. S.Q.A.P.K-ip, Sinerissap Qanittuani Aalisartut Piniartullu Kattuffiup, Ilulissat, siorna inassuteqaataa tunngavigalugu pisassiisoqarpoq.

- 2013-mi misileraalluni aalisartoqartussanngormat aalisartunit ukiakkut misileraanissaq orniginartinneqanngilaq. Taamaammat aalisartut siunnersuutigaat misileraalluni aalisarneq ukiaatinnagu pisariaqartoq, tamannalu ukiannginnerani ingerlanneqartariaqarluni, Aalisarnermut, Piniarnermut Nunalerinermullu Naalakkersuisoq, Finn Karlsen oqarpoq.

Misileraalluni aalisarnissamut inassuteqaat tunngaveqarpoq aqutsiveqarfik Qeqertarsuup Tunuani juulimut qaleralittassiissutit nungummata.

Siunnersuutaavoq qalerallit 500 tonsit aalisarneqassasut, juulimi 250 tonsit aggustimilu aamma taama amerlatigisut.

Misileraalluni aalisarneq umiatsiaararsortunit aqutsiveqarfimmi Qeqertarsuup Tunuani, Uummannami Upernavimmilu aalisarsinnaanermut akuersissutilinnit peqataaffigineqarsinnaavoq, taakkuli Ilulissani, Qeqertarsuarmi, Qasigiannguani, Aasianni Kangaatsiamilu najugaqartuussapput.

Immap assinga kakkiullugu ilanngunneqarpoq.

ILANNGUSSAQ 1 _BILAG 1 [DOK1633743]