Akuersissutit pisassallu piuminarnerulissapput

Stemningsbillede

Inuusuttut imarsiornermik ilinniarsimasut immikkut ittumik akuersissutinik tunineqarsinnaanngorput, inuusuttulluunniit alliartornerminni nalinginnaasumik aalisarsimasut naammattumillu piginnaasaqalersimasut aamma immikkut ittumik akuersissutinik tunineqarsinnaanngorlutik.

Naalakkersuisut aalisarsinnaanermut pisassiissutillu pillugit nalunaarut nutaaq ataasinngormat, juulip arfineq aappaanni akuersissutigaat. Nalunaarut allannguutitalik juulip naalernerani atuutilissalluni.

Nalunaarummi allannguutaalersut arfineq marluusut tassaapput Naalakkersuisunit nalunaarummut ilanngunneqartussatut kissaatigineqarsimasut.

Aajuku aalisarsinnaanermut akuersissutit pisassiissutillu pillugit nalunaarutip allannguutai:

• Inuusuttunut aalisartunut Imarsiornermut Ilinniarfimmi aalisarnermik ilinniarsimasunut imaluunniit Aalisarnermik Piniarnermillu Ilinniarfimmi ilinniarsimasunut immikkut ittumik akuersissuteqartoqarsinnaavoq. Akuersissummik tunineqarnissamut piumasaqaataavoq pineqartup inuussutissarsiummik umiatsiaqarnissaa aamma aalisarnermi atortoqarnissaa.

• Kiisalu inuusuttunut alliartornerminni nalinginnaasumik aalisarsimasut naammattunik piginnaasaqalersimasunut immikkut ittumik akuersissuteqartoqarsinnaalissalluni. Akuersissummik tunineqarnissamut piumasaqaataavoq pineqartup inuussutissarsiummik umiatsiaqarnissaa aamma aalisarnermi atortoqarnissaa.

• Sinerissamut qanittumi qaleralinniummi inuttaasut ukiuunerani qaammatini aalajangersimasuni immikkut ittumik akuersissummik tunineqarsinnaapput. Tassani piumasaqaataavoq pineqartup uppernarsarsinnaassagaa sivikinnerpaamik ukiumi ataatsimi ataavartumik inuttatut sulisimanini, kiisalu pineqartup inuussutissarsiummik umiatsiaqarnini aalisarnissamullu atortoqarnini.

• Piffissamut killilikkamut akuersissutit ukiunut marlunnut atuuttussanngortinneqarneri.

• Sinerissamut qanittumi umiatsiaararsorluni aalisakkanik sunilluunniit aalisarnissamut akuersissutit nalinginnaasut atuuttussanngortinneqarneri. Akuersissulli nalinginnaasoq taanna Qeqertarsuup Tunuani, Upernavimmi Uummannamilu aqutsiveqarfinni qaleralinniarnissamut atuutsinneqanngilaq. Aqutsiveqarfinni taakkunani qaleralinniarnissamut akuersissutit suli immikkut ittumik tunniunneqartassapput.

• Umiatsiaaqqanik saarullinniarnermi tunisinikkut killilersuisoqartinnagu tamanut immikkut akuersisoqarsinnaanissaanut periarfissiisoqassaaq. Taamaalilluni kikkunnut tamanut saarullinniarlunilu tunisisinnaanissamullu periarfissiisoqassaaq.

• Pisassiissutinik pigisaqarluni sinerissamut qanittumi qaleralinniarnissamut akuersissuteqartarnermi pisassiissutinik ukiumiit ukiumut nuussisinnaaneq atuutsinneqalissaaq.

 

Attavissaq: Jørgen I. Olsen, email: jio@nanoq.gl, tlf: 345308, Aalisarnermut, Piniarnermut Nunalerinermullu Naalakkersuisoqarfik.