Isumaliutersuut: Tunisisartut amerlaqisut – ukiumut qaleralittassiissutit

Allaatiginnittoq: Aalisarnermut, Piniarnermut Nunalerinermullu Naalakkersuisoq, Finn Karlsen

Inatsisartuni ilaasortaq, Nikolaj Jeremiassen, Siumut, Inatsisartullu aalisarnermut, piniarnermut nunalerinermullu ataatsimiititaliaani siulittaasuusoq tusagassiuutikkut nalunaarpoq Qeqertarsuup Tunuani umiatsiaararsortut qaammammut pisassiissutaasut, juuli aallartiinnartoq, nungunneqarneri ernummatigalugu.

Inatsisartuni ilaasortap, Nikolaj Jeremiassenip, tusagassiuutikkut nalunaarummini pingaartilluinnarlugu erseqqissarpaa ilumut ernumassutissaqarluta, qaammat aallartiinnartoq umiatsiaararsortorpassuit qaammatip sinnerani pisassaarummata. Aqutsiveqarfik Qeqertarsuup Tunuani pisassiissutigineqartut, tamaani umiatsiaararsortunit 370-usunit pisarineqartussat nungunneqarmata.

Nikolaj Jeremiassenip umiatsiaaqqat taama amerlatigisut qaammatip sinnerani pisassaarunnerat pillugu ernumassuteqarnera paasisinnaalluinnarpara, oqarmallu tupaallaatissaanngitsoq umiatsiaararsortut aqutsiveqarfinnit allaneersut Qeqertarsuup Tunuanut katersuuttarmata, tamaani tunitsiveqartitsineq pitsaanerummat tunisallu akisunerusarlutik.

Aqutsiveqarfik Qeqertarsuup Tunuani qaleralittassiissutit 9.000 tonsiupput, taakkunanit 4.206 tonsit umiatsiaararsortunut pisassiissutaallutik.

Aqutsiveqarfimmi Uummannami umiatsiaararsortut aqutsiveqarfik Qeqertarsuup Tunuani aamma Upernavimmi aalisarsinnaasut 223-upput.

Imaappoq Aqutsiveqarfik Qeqertarsuup Tunuani pisassiissutit juulip tallimaanni nungunngikkallarmata, tamaani umiatsiaararsortut katillutik 4-500-usut Ilulissani tunitsivinnut Royal Greenlandimut, Halibut Greenlandimut aamma Qeqertaq Fishimut sapaatip akunneranut 200 tonsit missaanniittut tunisaraat.

Qaammammut pisassiissutaasut 421 tonsit, juunimi sippuilluni aalisarsimanermit ilanngaatigineqartut 104 tonsit ilanngunnagit aalisarneqarput, 317 tonsit aalisarneqarlutik.

Taamaalilluni umiatsiaararsortut paggatassiilluni qaleralittassiissutigineqartartunut naapertuutinngilluinnalerput, umiatsiaararsortut pisassiissutinut sanilliullugit amerlavallaarmata.

Taamaattumik isumaqarpunga paggatassiilluni qaleralinniartarneq unitsinneqartariaqartoq. Februaarimili tamanna erseqqissaassutigereerpara, oqarama aqutsiveqarfinni Upernavimmi, Uummannami Qeqertarsuullu Tunuani paggatassiilluni qaleralinniartitsisarneq unitsinneqartariaqartoq.

Paggatassiilluni qaleralinniartarneq aallartimmalli umiatsiaararsortut, qaammammut pisassiissutigineqartut ammarneqannginnerini ullunik marlunnik pingasunilluunniit sioqqutsillutik aalisalereertarput. Tamanna umiatsiaararsortunut peqqinnarnerpaanngilaq.

Aqutsiveqarfinni pineqartuni umiatsiaararsortut atugaat pitsaanerulersinneqassappata, taakkununnga aaqqiissutissaq pitsaanerpaaq tassaavoq ukiumut aalajangersimasunik qaleralittassiisalernissaq. Umiatsiaararsortut ukiumut aalajangersimasunik pisassinneqartalerpata ukiup sinneranut pisassaqarnertik ernumassutigiunnaassavaat.

Nikolaj Jeremiassen aamma allappoq qangarsuarli siulivut taamatut inuunerarlugit, nunarpullu inoqartuassappat tamanna saneqqunneqarsinnaanngitsoq. Ilumoorpoq siulivut qangarsuarli taamatut inuuneqarmata. Eqqaamasariaqartorli tassaavoq Naalakkersuisut pingaartillugu aalajangiussaat tassaammat uumassusilinnik piniarneq piujuaannartitsinermik tunngaveqarluinnarmat.

Oqaatigisariaqartorli pingaaruteqarluinnartoq aamma tassaavoq nakkutigisaasumik aalajangersakkanillu tunngaveqarluni pisassiisoqartariaqarmat, taamaanngippat kinguaassavut eqqarsaatigalugit ernumanissamut tunngavissaqarluaratta.

Uummannap sulluani Qeqertarsuullu Tunuata aqutsiveqarfiini qaleralinniarnermi ajornartorsiutit aaqqiiviginiarlugit sulissuteqarneq ingerlavoq. Uummannap sulluani umiarsualiinissamik qinnuteqaat juunimi akuerineqarpoq, ajornartorsiuteqartoqarnerali pissutaalluni suli maannamut tamanna akuerineqartumit naammassineqanngilaq.

Tamanna Naalakkersuisutut isiginngitsuusaarniannginnakku sukkasuumik aaqqiisoqartariaqarmat Uummannap sulluaniit qaleralinnik Ilulissanut assartuisoqarnissaanik maannakkut akuersissuteqarpunga, taamaalilluni tunisiniarnikkut iluaqusiinissaq siunertarineqarluni aammalu umiatsiaararsortut Uummannap eqqaaniit Qeqertarsuup Tunuanut aalisariartartut ikilisinneqarsinnaammata, tamannalu aaqqiigallarnerussaaq.
Aaqqiissutissaq ataavartoq siuliani taariigara ingerlatseqatigiiffinniit naammassineqarnissaa utaqqisariaqassavarput.

Naalakkersuisoqarfimmit assartuisussaq, tassalu Halibut Greenland piumaffigineqarpoq qalerallit aqutsiveqarfimmi Uummannami pisarineqarsimasut aqutsiveqarfik Qeqertarsuup Tunuanitulli akilertassagai.

Nassuerutigalugu oqaatigisariaqartoq tassaavoq paggatassiilluni qaleralittassiisarneq unitsinneqartariaqarmat. Naalakkersuinermik suliaqartuusugut kattuffiit aalisarnermik sammisallit qanimut suleqatigalugit aqutsiveqarfinni pineqartuni pitsaanerusumik attanneqarsinnaasunillu aaqqiissutissarsiortariaqalerpugut.

Aaqqiissutissallu ilaat tassaavoq umiatsiaararsortunut 774-usunut immikkut ukiumut pisassiisalernissaq.