Upernaviup avannaani misileraalluni raajarniartoqassaaq

Naalakkersuisut akuersissutigivaa nunatta avannaani, Upernaviup avannaani misileraalluni raajarniartoqarsinnaassasoq. Raajat katillugit 2.000 tonsit pisarineqarsinnaassallutik. Taakku siulliunniulluni aalisarneqarsinnaassapput.

Pinngortitaleriffik paasissutissanik amerlanerusumik perusuppoq.

Aatsaavissuaq tamaani misileraalluni raajarniartoqalinngilaq, siorna aamma misileraasoqarmat.

Naalakkersuisoqatigiit isumaqatigiissutaasa ilagaat aalisakkanik isumalluutit pitsaanerusumik atorneqarnissaannik qitiutitsisoqassasoq.

Naalakkersuisooqatigiit isumaqatigiissutaat tunngavigalugu Kalaallit Nunaanni Sulisitsisut Peqatigiiffiata ataaniittup Aalisarnermik nioqqutissiornermillu inuussutissarsiortut brancheudvalgiata siunnersuutaa tunngavigalugu Naalakkersuisoqarfiup Kalaallit Nunaata Avannaata Kitaani misileraalluni raajarniartoqarnissaanut 2013-imi akuersissuteqarnissaq, Pinngortitaleriffimmik suleqateqarluni tamanna suliaraa.

Uumassusillit pillugit paasissutissanik tamaanngaannersunik amigaateqartoqarpoq, soorlu tamanna qanoq amerlatigisunik raajaqarnersoq ilisimasaqarfigineqarani, misissuisarnerniillu paasissutissanik tunngavissaqartitsisoqarani.

Pinngortitaleriffimmit neriuutigineqarpoq misileraalluni aalisarnerup aallartisarnerani ingerlanneranilu ilisimatuussutsikkut atorsinnaasunik paasissutissanik peqalernermik kinguneqarumaartoq, taamaasilluni tamaani misissuilluni angalasoqarsimannginneranut taartaajumaarluni, raajanillu misissuisimannginnermut tamanna taartaajumaarluni.