Erseqqissaaneq: Allagaatinik takunnikkumaneq itigartinneqanngilaq

Nutaarsiassaqartitsivik Sermitsiaq.AG ippassaq allappoq Naalakkersuisut innuttaasunik ataatsimiisitsiartorlutik Siumullu ukiumoortumik ataatsimeersuarneranut peqataajartorlutik Maniitsumut angalanerannut aningaasartuutit pillugit allagaatinik takunnikkumaneq Naalakkersuisunit itigartitsissutigineqarsimasoq. Tamanna ilumuunngilaq.

Erseqqissaatigineqassaaq naatsorsuutit inaarutaasut suli Naalakkersuisut Siulittaasuata Naalakkersuisoqarfianit suli tiguneqarsimanngimmata allagaatinik takunnikkumaneq piffissarititaasup iluani naammassineqarsinnaasimanngitsoq. Tamanna Sermitsiaq.AG-mi aaqqissuisumut Søren Duran Duusimut malugeqquneqarpoq.

 

Naalakkersuisut Siulittaasuata Naalakkersuisoqarfiata suliaq uterfigissavaa naatsorsuutit inaarutaasut tiguneqarsimalerpata.

 

 

 

Paasisaqarnerorusukkuit attavisiginnaavat Kim Blokbo, Naalakkersuisut Siulittaasuata Naalakkersuisoqarfiani Inatsisilerinermi pisortaq oqarasuaammut +299 34 5000 imaluunniit e-mailimut kimb@nanoq.gl.