Aviisit nammineersinnaalerput

Aviisit nuna tamakkerlugu saqqummertartut tapiissutinik ukiumut qinnuteqarsinnaapput, ukiorlu manna tapiissutit DKK 2,5 million koruuniullutik. Aningaasaateqarfiup Inuussutissarsiornermik Ingerlatsisup Sermitsiaq.AG-p periarfissaq taanna atussallugu aalajangerpaa, taamaattumillu tapiissuteqarfigineqarnissamik qinnuteqarsimalluni.

Aningaasaateqarfik Inuussutissarsiornermik Ingerlatsisoq Sermitsiaq.AG ukiuni kingullerni pingasuni DKK 5,7 million koruunit sinnerlugit sinneqartoorpoq. Qulaani sinneqartoorutinik taaneqartuni DKK 5,5 million koruunit tapiissutaasimasut ilanngunneqanngillat, taakkuuppullu aningaasaateqarfimmut Naalakkersuisunit ukiuni kingullerni pingasuni katillugit tapiissutaasimasut. Tapiissutit ilanngullugit sinneqartoorutit piffissami tassani katillugit 11,2 million koruuniusimapput.

Taamaammat qinnuteqaat itigartinniarlugu Naalakkersuisut aalajangerput Sermitsiaq.AG-ip aningaasaqarnikkut inissisimalluarnera tapiissutinillu pisariaqartitsinani aalajaatsumik ingerlanera tunngavilersuutigalugit.

Naalakkersuisut tapiissuteqartarnerminni aningaasaateqarfiup nuna tamakkerlugu saqqummersitsisarnerata qulakkeernissaa aallaqqaammut siunertaraat. Tapiissutit ukiunut pingasunut tunniunneqarput, taamaaliornikkut siammarterinermi aqqutissat allat siuarsarnissaannut imaluunniit tunisassiornermut naammassisaqarfiunerusumut teknologimik iliuuseqarnissamut aningaasaateqarfik periarfissinniarlugu.

Taamaattumik ukioq manna tapiissutinik qinnuteqaat itigartissallugu Naalakkersuisut aalajangiinerat nikalluutissaanngilaq - akerlianilli nutaarsiassaavoq nuannaarutissaasoq, Naalakkersuisut siulittaasuat, Aleqa Hammond naqissusiivoq:

”Aviisip ukiut kingulliit ineriartorfigisimavaa kusanartunillu angusaqarluni, siunissami unammilligassanut ullumikkut sillimmatissaqarlualersimalluni. Tamatuma saniatigut akiitsutik ikilingaatsiarpaat. Tamanna killilersugaanani oqaaseqarsinnaanermut nutaarsiassatsialaavoq. Tamannami isumaqarpoq, aviisit Sermitsiaq aamma AG tusagassiorfittut kiffaanngissuseqartutut pituttugaanngitsutullu imminnut napatissinnaanerminnut piareersimalersut,” Aleqa Hammond oqarpoq.

Naalakkersuisut sipaarniutit atorlugit Kalaallit Nunaanni tamarmi tusagassiutit tapiissutinik qinnuteqarnissamut siunissami periarfissaqalersippai.

 

Mininnguaq Kleist, Pisortaq
Oqarasuaat: +299 34 51 32
E-mail: mikl@nanoq.gl