Ilinniarnertuunngorniarfinni ilinniartut Kangerlussuup eqqaani pinngortitaq misissorpaat

Sermersuaq qanoq sukkatigisumik aakkiartorpa, nunarsuullu kissatsikkiartorneranut naasut uumasullu qanoq qisuariaateqarpat. Apeqqutit taakkuupput nunatsinni ilinniarnertuunngorniarfinni ilinniartut arfineq pingasut ukioqatitik Danmarkimeersut USA-meersullu peqatigalugit pinngortitamik ilisimatusarnermik aasaanerani atuarfimmi akissutissarsiniagassaat.

Ulluni makkunani pinngortitamik ilisimatusarnermik aasaanerani atuarfik Joint Committee suleqatigalugu Kangerlussuarmi sisamassaa ingerlanneqarpoq. Ilinniarnertuunngorniarfinni ilinniartut, tuluttut piginnaasaqarluartut, biologiimilu, geografimi, fysikimi kemimilu immikkut ittumik soqutigisallit Kalaallit Nunaannit peqataapput.

Inuusuttut Kangerlussuarmi ilisimatusarnermik suliaqartutut malinnaavigissavaat namminnerlu ilisimatusarnermik suliniutik suliaqassallutik. Ilinniagaqartut ilaatigut USA-p kangimut avannaani Penn State Universitymi ilisimatusarnermik suliallit naapissavaat, taakkua misissorpaat silap kiannerulernerata naasut uumasullu qanoq sunnertarneraat.

Ilisimatusarnermik suliaqartut isumaqarput Kalaallit Nunaanni orpikkat amerliumaartut imaqaluunniit allaat orpeqalerluni, naasut ivikkallu ikilissallutik.

Ilinniartut amerikamiu ilisimatusarnermik suliaqartoq David Watts apersoraat uani takuuk: https://www.youtube.com/watch?v=T5DIrMBGfWw

Ilisimatusarnermik suliaqartunik naapitaqarnermik saniatigut ilinniartut namminneq misissuissapput, ilaatigullu uppernarsarsinnaasimavaat Kangerlussuup eqqaani sermersuaq aasaanerani sapaatip akunnerata ataasiinnaap ingerlanerani 60 cm tikillugu annikillilluni aakkiartortartoq.

2013-imi aasaanerani atuarfimmi ilinniartut inuilaami sulinerat uani takuuk: https://www.youtube.com/watch?v=mBbaTVDM4tQ

”Hey, sapinngippagu, soorunami aamma uagut sapissanngilarput”, taama oqarpoq Aviaja Petersen Nuummi GUX-imeersoq, kalaaleq ilisimatusarnermik suliaqartoq Aviaja Lyberth Hauptmann Danmarks Tekniske Universitetimi ph.d.-mik ilisimatusartutut inuunerminik oqaluttuartoq tusarnaareerlugu.

Aviaja Lyberth Hauptmann ukioq manna aammaarluni aasaanerani atuarfimmut tikeraarpoq, issittumilu enzymenik soqutiginartunik suliffissuaqarnermilu atorsinnaagunartunik ujarlernini pillugu oqaluttuarniarluni.

Kalaallit Nunaanni pinngortitamik misissuinerminik oqaluttuarnermi saniatigut, ilinniagaqaqqinnerup qanoq ililluni ajunngitsumik ingerlatiinnarsinnaanera pillugu Aviaja siunnersuivoq.

”Aviaja Lyberth Hauptmann ilinniartunut pinngortitamik ilisimatusarnermik sivisunerusumik ingerlataqarnissamik takorluukkaninnik piviusunngortitserusuttunut pitsaalluinnartumik maligassiuisuuvoq”, aasaanerani atuarfiup aqutsisua Kasper Busk oqarpoq.

Ilinniartut Aviajamik apersuinerat uani takuuk: https://www.youtube.com/watch?v=Z_pUmhmsenI

Aasaanerani atuarfimmut pingaaruteqarluni ilaasoq tassaavoq misilittakkat ikinngutinut, ilaquttanut Kalaallit Nunaatalu sinneranut ingerlateqqinnissaat, taamaasilluni Kalaallit Nunaanni pinngortitamik ilisimasatusarnerup naluneqannginnera annertusissammat.

Aasaanerani atuarfimmiit tuluttut nutaarsiassat blogerluni ullut tamaasa allanneqartarput uani: www.polartrec.com/expeditions/joint-science-education-project-2014 aasaaneranilu atuarfiup YouTubemi kanalia aqqutalugu videot ataavartumik aaneqarsinnaallutik, uani: https://www.youtube.com/channel/UCgMQ4_RH8ZzMgm1_ESjV47Q

Aasaanerani atuarfiup immikkoortua siulleq 9. juli naammassissaaq, ilinniartullu ilaat sermersuup qaarpiaani sermersuarmi ilisimatuussutsikkut misissuivimmut Summitimut 3.300 miiterinik qaffasissusilimmiittumut ingerlaqqissapput.

Pivisut: Joint Committee-mi suleqatigiinnermut Igalikumi Isumaqatigiissut tunngaviuvoq, Kalaallillu Nunaata USA-llu suleqatigiinnerisa siuarsarnissaat nukittorsarnissaallu siunertaalluni. Aammattaaq suliniutikkut inuusuttut amerlanerusut pinngortitamik ilisimatusarnermik toqqaasalersinniarneqarput, taamatut ilinniagallit ullumikkut siunissamilu atorfissaqartikkatsigit.



Attaveqarfissat pillugit paasissutissat:

Kasper Busk, aasaanerani atuarfimmik aqutsisoq
Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfik
PO Box 1029,
3900 Nuuk, Greenland
kabu@nanoq.gl
Oqarasuaat: +299 223628

Atuartunik attaveqarusukkuit Kasper Busk aqqutigalugu attavigisinnaavatit.