Kitaani misileraalluni avaleraasartorniartoqassaaq

Stemningsbillede

Naalakkersuisut Kalaallit Nunaata Kitaani avaleraasartuut 10.000 tonsit paggatassiissutitut misileraalluni aalisarneqarsinnaasussatut akuerivaat.

Ingerlatseqatigiiffiit Kitaani avaleraasartoorniarnissaminnut soqutiginnittut, avaleraasartoorniarlutik aallartissinnaanngorput. Ingerlatseqatigiiffiit tassaallutik Tunumi avaleraasartoorniarnissaminnut akuersissutinik tunineqarsimasut.

Aalisarnermut, Piniarnermut Nunalerinermullu Naalakkersuisoqarfik ingerlatseqatigiiffinnit arlaqartunit Tunumi avaleraasartoorniarnissamut akuersissummik tunineqarsimasunit immikkut qinnuteqaatinik arlalissuarnik tigusaqarsimavoq, Kitaani avaleraasartoorniarnissaminnut isumaliuteqartunit.

Pinngortitaleriffimmit ilimagineqarpoq, sarfaq saarulliit aalisakkallu allat ingerlaartarfiat malillugu avaleraasartuut Tunumiit Kitaanut ingerlaartartut. Taamaattumik ilimagineqarsinnaavoq, Tunumi avaleraasartuut amerliartortillugit aamma qularutissaanngitsumik Kitaani avaleraasartuut suli takussaanerulerumaartut.

Pinngortitaleriffimmit Kitaani qanoq avaleraasartooqartiginerata paasisaqarfiginissaa assut soqutiginartinneqarpoq, tassuunami qanoq peqartiginera.

Paasissutissat tamakkua Aalisarnermut, Piniarnermut Nunalerinermullu Naalakkersuisoqarfimmiit soqutiginartinneqartorujussuupput, tassami siunissami naalagaaffittut sinerissamut qanittutut inissisimalernissatta qinnutiginissaanut avaleraasartuunillu ataatsimut pisassiissutaasartunik naammattunik pisassinneqartarnissatsinnik piumasaqaateqarnissatsinnut tunuliaqutaasinnaammata.

Aamma annerusumik misileraalluni aalisartitsinikkut nunattalu Kitaa misissuiffigalugu aningaasarsiutissatut soqutiginartinneqarpallaannginnguatsiartoq, taamaalilluni nunatsinni avaleraasartoorniarnerup misileraalluni aalisarnertut ingerlanneqarneranik tamanna naqissusiinerussaaq, suleqatigisatsinnit arlalinnit apeqquserneqarsimagaluartoq.