Sukkunik immuullu sukkuanik sapigaqarneq sunaana?

Nunatsinni innuttaasut amerlasuut sukkunik immuullu sukkuanik sapigaqartuupput, aamma tamanna ilisimanagu. Inuussutissat Timigissartarnerlu pillugit Siunnersuisoqatigiit Peqqissutsimut Attaveqarnermullu Naalakkersuisoqarfik suleqatigalugu maannakkut quppersagaaqqat paasissutissiissutit saqqummerseqqammerpaat.

Laktose immuit sukkuannik taaguutaavoq aammalu immummi immunniillu tunisassianut nalinginnarmik ilaalluni. Sakkarose sukkunut taaguutaavoq, inuussutissanilu tunisassiarineqartuni amerlasuuni tunguarnitsunilu ilaalluni. Sapigaqaraanni enzymet sukkunik taakkuninnga suujunnaartitsisussaq amigaataasarpoq, tamannalu nerisat arrorsarnerannik ajornartorsiuteqarnermik naarlunnermillu kinguneqartarpoq.

”Nerisassat innuttaasut peqqissusaannik suliniummi Inuuneritta II-mi pingaartinneqartorujussuupput, tassa nerisassat peqqissutsitsinnut pingaaruteqartorujussuummata. Laktosemik aamma Sukkunik sapigaqarneq pillugu quppersagaaqqat paasissutissiissutit piffissami sivisuumi ujartorneqarnikuupput, nerisaqarnerlu pillugu ilitsersuinermut maannakkut ilaallutik”, taamatut oqarpoq Peqqissutsimut Attaveqarnermullu Naalakkersuisoq, Steen Lynge.

Quppersagaaqqat ”Laktosemik arrortitsisinnaannginneq”, ”Sukkumik arrortitsisinnaannginneq” aamma ”Sukkumik & Laktosemik arrortitsisinaanngineq” nunatsinni napparsimavinni, peqqissaavinni atuagaateqarfinnilu maannakkut pissarsiarineqarsinnaalerput, kiisalu Peqqissuseq pillugu nittartakkami www.peqqik.gl  atuarneqarsinnaallutillu aaneqarsinnaapput.

Paasisaqarnerorusukkuit Inuussutissat Timigissartarnerlu pillugit Siunnersuisoqatigiit siulittaasuat
Gert Mulvad attaveqarfigiuk oqarasuaat +299 34 44 71 imaluunniit e-mail
gm@peqqik.gl