Japanimiut ambassadøriata Ilulissanut Nuummullu tikeraarnera

Japanimiut ambassadøriat Seishi Suei sapaatip akunnerani uani Kalaallit Nunaat siullerpaamik tikeraarpaa piffissamilu 30.-1. juli Ilulissaniilluni piffissamilu 1.-4. juli Nuummiilluni.

Ambassadør Sueip ilaatigut ataatsimeeqatigai Naalakkersuisut Siulittaasuat Aleqa Hammond, Aningaasaqarnermut Nunamullu Namminermut Naalakkersuisoq Vittus Qujaukitsoq, kiisalu Aalisarnermut, Piniarnermut Nunalerinermullu Naalakkersuisoq, Finn Karlsen. Tamatuma saniatigut nunatsinni inuussutissarsiuteqartut ataatsimeeqatigineqarput ilaatigut ataatsimeeqatigineqarlutik Royal Greenland aamma Visit Greenland.

Ataatsimiinnerni uuliasiornerup aatsitassarsiornerullu, aalisarnerup takornariaqarnerullu iluini annertunerusumik niueqatigiissinnaanissamut nunallu marluk akornanni suleqatigiissinnaanerit annertusarneqarnissaanut periarfissat salliutillugit eqqartorneqartarput.

Nuummi tikeraarnerminut atatillugu ambassadørip Japanimiut Film Festivaleqartitsinerat 2014 Katuami ulluni 2.-4. juli ingerlanneqartoq ammarpaa, ilutigalugu workshopeqartitsinerit ilaatigut origami allallu pillugit Nunatta Atuakkanik Atorniartarfiani ingerlanneqarput.

Aleqa Hammond oqarpoq:

’’Japanimit pisortatigoortumik tikeraarteqarnerput nuannaarutigaara tikeraarnerlu Kalaallit Nunaata Japanillu akornanni suleqatigiinnerup nukittorsarneqarnissaata soqutigineqarneratut isigaara.

Japani ukiut 20-t sinnerlugit Kalaallit Nunaata pingaarutilimmik niueqatigisarsimavaa aningaasaqarnikkut kulturikkullu suleqatigineratigut. Nunagut marluusut qanimut suleqatigiinnerat pingaartitarilluinnarpara, tamanna assersuutigalugu japanimiut filmfestivaleqartitsineratigut takutinneqarpoq.

Aningaasaqarneq eqqarsaatigalugu Japan nunat niueqatigisartakkatta pingaarnersaasa ilagaat pingaartumillu aalisagaatitta puisinillu tunisassiaatitta annertunerusumik niuerutigineqartalernissaat periarfissagissaartutut isigaarput, tamakkulu decembarimi Japanimi niuernikkut saqqummersitsinissatsinni saqqummiunnissaat qilanaaraarput.

Japanimik pitsaasumik suleqateqarneq ingerlareersoq attattuartariaqarparput japanimiullu Kalaallit Nunaanut tikilluaqqusaanerat qulakkeerlugu ilisimatitsissutigiuartariaqarparput.’’