Ilagiit oqaluffiat inuiaqatigiit oqaluffigaat

Inatsisissatut siunnersuummik takkuttoqassaqqaarpoq – biskoppimut akissut, juli 2014.

”Nuannaarutigaara Biskoppi Sofia Petersen maanna tusagassiorfinnut sassarmat ilagiillu oqaasissaqarnerulernissaannik oqariartuutiga oqaaseqarfigalugu. Uangami kissaatigaara nunatsinni ilagiit pillugit oqallinnermik aallartitsinissara, 2015-ip ukiaani inatsisissatut siunnersuummik saqqummiussinissama tungaanut ingerlasussamik. Oqallitsitsinermi periarfissat ilagaat, ilagiinni atuisut inatsisiliornitsinni peqataatinneqarnissaat. Pilersaarutigaaralu ilagiinni siunissarput pillugu 2015-imi januari qaammat isumasioqatigiissitsiniarlunga, tassanngaaniillu isumaliutaasut soorunami inatsisiliornermi ilanngunneqarumaarput”.

Naalakkersuisoq Nick Nielsen sulinngiffeqarnerminut atatillugu Kangerlussuarmiit oqaaseqarpoq, ingerlaqqillunilu:

”Uteqqillaralu uanga ernumanartoqartikkiga nunatsinni oqaluffiit sapaatit tamaasa ila-giinnit ornigarneqarneq ajormata, ernummatigaaralu biskoppimik ataatsimeeqateqartarninni akissutissarsisannginnakku ilagiinni ulluinnarni qullersatta tamanna allannguiffiginiarlugu qanoq ittunik pilersaaruteqarnera, oqaluffiullu ilagiit peqataanerulersinniarlugit qanoq ittunik pilersaaruteqarnera akissutissaqartinneqanngimmat, tamatumani aamma inuusuttatta allallu ilagiinnut atanerulersinniarnissaat eqqarsaatigalugit, - aamma apeqqutit allat tamatumunnga attuumassuteqartut eqqarsaatigalugit. Tamatumani nipangiussiniartutut pissuseqarnermik naammattuuisarpunga, imaluunniimmi allaat ilagiit iluini namminermi pissutsinut akuleruttussaanngitsutut oqariartorfigineqartarlunga.

Ilageeqarneq pillugu Inatsisartut 2010-mi inatsisaatigut kissaatigineqarpoq ilagiinnut tunngasumik qitiusumik Namminersorlutik Oqartussani suliaasartut amerlasuut ilagiinni namminermi suliarineqartalernissaat. Tassani aalajangiunneqarpoq ilagiinnik aqutsinerup qitiusumik biskoppip allaffianut suli annertunerujartortumik katersorneqarnissaa, tassalu taanna qitiusumut sulianik eqiterisitsineq uanga isornartoqartippara. Ilagiit oqaluffiat inuiaqatigiit oqaluffigimmassuk, isumaqarpunga oqartussaassuseq tassani pineqartoq annertunerujartortumik ilagiinni namminerni inissisimasariaqartoq, taamaaliornikkut ila-giit peqataalersinneqassammata, sunniuteqartinneqalissammata, oqaluffeqarnitsinnullu tunngasuni aalajangiisumik oqartussaassuseqalerlutik.

Assersuutigalugu ilisimavara biskoppip allaffianut issiavissuarmik – sofamik - pisisoqarsimammat, 100.000 kr.-it sinnerlugit akilimmik, isumaqarpungalu taamatut akilimmik issiavissuarsiniarnissaq pingaarnersiuinermi ilaatinneqarsimanavianngikkaluartoq ilagiit aningaasaataannut tunngasumik tulleriiaarisarneq ilagiinni namminerni inissisimasimagaluarpat.”

Nick Nielsen-ilu naggasiilluni oqarpoq:

”Biskoppi isumaqaruni taarserneqarnissani sulissutigigiga, taava tamanna nammineq akisussaaffigiliuk. Uanga siunnerfigaara biskoppip siunissami taarserneqarsinnaalernissaa, - tamanna ilagiit kissaatigippassuk - maannakkutut killeqanngitsumik atorfeqarsinnaajunnaarlugu. Periarfissaq taanna isumaqarpunga aqqutissiuunneqassasoq ukiut sisamakkaarlugit atorfimmut tassunga qinersisalernikkut. Taamatut aaqqissuussinikkut ilagiit periarfissaqalissapput iliuuseqarsinnaanissaminnut, isumaqartoqarpat biskoppip suliassaminut akisussaaffini naammattumik aallutinngikkaa.”

Annertunerusumik paasisaqarniaraanni naalakkersuisup allattorigallagaa Nauja Brøns mobilimut 550 470-imut attavigineqarsinnaavoq.