Paasititsiniaanissaq oqaluuseraat

Aalisarnermut, Piniarnermut Nunalerinermullu Naalakkersuisoq, Finn Karlsen, Nunavummi Naalakkersuisut siulittaasuat Peter Taptuna pingasunngornerup ullaap tungaani pulaartoraa.

Aalisarnermut, Piniarnermut Nunalerinermullu Naalakkersuisup Nunavullu Naalakkersuisuisa siulittaasuata EU-p puisit amiinik eqqusseqqusinnginera ilaatigut oqaluuserivaat.

Isumaqatigiissutigaallu nunatsinni Nunavumilu puisinniartarneq pillugu, nunani puisinniartarneq pillugu qaammaasaqarpallaanngitsuni, paasititsiniaaneq annerusoq pisariaqartoq.

- Isumaqatigiissutigaarput puisit amii aamma puisinik piniartarnerup nunarsuarmioqataasunut ammanerusumik atuisutullu sammiveqartumik aamma nappateqartuunerput pillugu paasititsiniaanissamut sulisoqartariaqartoq, Finn Karlsen oqarpoq.

Ilanngullugu oqaatigaa Nunavummiut aallartitaasa kissaatigigaat piniartut nunatta ammerivianut puisit amiinik tunisisalerusullutik.

Ataatsimiittut ilaatigut oqaluuserisaat aamma tassaavoq nunatta Nunavullu nannut pillugit isumaqatigiissutitut atsiugaat.

Isumaqatigiissut taamani atsiorneqartoq Namminersornerullutik Oqartussat Nunavullu 2000-mi isumaqatigiissutigisaasa nanginneraa. Nannunik piujuaannartitsinissaq nannullu pillugit annerusumik suleqatigiinnissaq pillugu isumaqatigiissutaalluni.