Nunavummit Nunatsinniillu ataatsimoorluni tusagassiorfinnut nalunaarut

Nunarput ulluni 30. juumimiit 4. juulimut Nunavummit tikeraartunut, Nunavummi naalakkersuisut siulittaasuannit Peter Taptunamit aamma ilinniartitaanermut naalakkersuisumit Paul Quassamit siulersorneqartunut qaaqqusisuuvoq.

Peter Taptunap Naalakkersuisut Siulittaasuat Aleqa Hammond ulloq 1. juli ataatsimeeqatigaa. Ataatsimeeqatigiinnermi oqaluuserineqartut tassaapput Nuup Iqaluillu akornanni timmisartukkut attaveqaat, pisuussutitigut isumalluutit, aningaasaqarnikkut ineriartorneq, ilinniartitaaneq, piniarneq, aalisarneq aamma EU-p puisip amiinik tunisassianik EU-mut eqqusseqqusinnginnera.

Ataatsimeeqatigiinnermut malitsigitillugu Nunavut aamma Nunarput ulloq 2. juli ataatsimoorlutik qulequttat pingaarutilinnik angusaqarfiusinnaasut pillugit ataatsimoorlutik nalunaarummik atsioqatigiipput.

Aleqa Hammond ataatsimeeqatigeereernerup kingorna ima oqarpoq:

”Kimmut sanilitta suleqatiginissaat Naalakkersuisunut pingaaruteqarpoq, Nunavormiullu assigiissuterpassuaqarlutalu ataatsimut soqutigisaqaqatigiikkatta. Nunatta Nunavut arlalitsigut pitsaasumik suleqatigereerpaa.

Ataatsimeeqatigiinnitsinni qanimut suli annertunerusumik suleqatigiissutigisinnaasavut salliutillugit eqqartorpavut. EU-p puisip amiinik eqqusseqqusinnginnerata oqaloqatigiissutiginera immikkut ittumik taarusuppara. EU-p puisip amiinik eqqusseqqusinnginnerata Nunavummi Nunatsinnilu piniartut sakkortoorujussuarmik eqqorpai.

WTO-mut suliakkiissutigineqartup naammassineqarnerani EU-mut iliuuseqarnitta ataqatigiissarnissaa pingaaruteqarpoq. Qaammatip matuma ingerlanerani Peter Taptunalu ICC-p Inuvimmi ataatsimeersuarnerani peqataassaagut, tassanilu puisit amiinik eqqusseqqusiunnaarneq aamma oqallisigissavarput.”

Peter Taptuna ataatsimeeqatigeereernerup kingorna ima oqarpoq:

”Namminersorlutik Oqartussat Nunavummilu Naalakkersuisut akornanni illuatungeriilluni oqaloqatigiinnerit suleqatigiinnissamut periarfissat ilisimasallu avitseqatigiissutiginissaat suli annertunerulersissavaat.

Suliassaqarfiit ilaat inatsisitigut ataatsimut soqutigisaqaqatigiissutigaagut, tassanilu killeqarfiit akimorlugit suleqatigiinnermi periarfissatigut iluaqutaasinnaasut takusinnaavakka, soorlu Nuup Iqaluillu akornanni timmisartukkut aqqut.

Piniarnermut aalisarnermullu tunngatillugu niueqatigiinnikkut qanimut suleqatigiinnissamik periarfissat soqutigaagut, ingammik attanneqarsinnaasunik periarfissaqarpat kiisalu niuerfinnut annertunerusumik periarfissagut annertusarsinnaagutsigit.

Kalaallit Nunaat Nunavullu puisinniarnermi piujuaannartitsinermut atatillugu assigiinnik naleqartitaqarput. Qanimut suleqatigiilluta nunatsinni puisinniarnermik aammalu puisinniarnerup inooriaasitsinnut, aningaasarsiornitsinnut inuiaqatigiinnullu tamatsinnut pingaaruteqassusaa pillugu EU-p paasinninnerunissaa anguniarlugu siuttuunerput ingerlatiinnassavarput.”

Naalakkersuisut Siulittaasuata Aleqa Hammondip ataatsimeeqatiginerata saniatigut Peter Taptunap Aalisarnermut, Piniarnermut Nunalerinermullu Naalakkersuisoq Finn Karlsen, Inatsisartut Siulittaasuat Lars-Emil Johansen, Inatsisartut Nunanut Allanut Sillimaniarnermullu Ataatsimiisitaliaat kiisalu suliffeqarfissuarmi Royal Greenlandimi pisortaaneq Mikael Thinghuus naapippai.

Sisamanngornermi 3. juli Naalakkersuisut Siulittaasuata tikeraat Nuup Kangerluani umiatsiamik angalaaqatigissavai Qooqqunukaqatigalugillu.

Joint Statement of Aleqa Hammond, Premier of Greenland, and Peter Taptuna, Premier of Nunavut Nuuk, 1 July 2014_GL


Atsioqatigiinnermit assilisat.


Paasissutissanik sukumiinerusunik uunga saaffiginninnikkut pissarsisoqarsinnaavoq:
Pisortaq Kai Holst Andersen, Nunanut Allanut Pisortaqarfik, oqarasuaat angallattagaq: 55 33 31