Naalakkersuisut Siulittaasuata Kujataani angalanera

Naalakkkersuisut Siulittaasuata Aleqa Hammondip Kujataani 24. – 27. juuni 2014 angalanerminut atatillugu ilaatigut Great Greenlandip ulloq 25. juuni 2014 ataatsimeersuarnera peqataaffigaa.

Taassuma saniatigut Qaqortup katersortarfiani inunnit 30-t missaanniittunit peqataaffigineqartumik marlunngornermi 24. juuni 2014, aamma Narsap katersortarfiani inunnit 80-it missaanniittunit peqataaffigineqartumik sisamanngornermi 26. juuni 2014, innuttaasunik ataatsimiisitsivoq.

Naalakkersuisut Siulittaasuata Kujataani angalanini naggaserlugu savaatillit ataatsimeersuarnerat ulloq 27. juuni 2014 ammarpaa.

Ataatsimiinnerit siuliani taaneqartut aallarnerlugit Naalakkersuisut Siulittaasuat Aleqa Hammond Naalakkersuisut suliaat ukiunilu tulliuttuni suliassatut pilersaarutaat, naalakkersuisooqatigiinnissamik tunngaveqartut, saqqummiuppai.

Saqqummiussinerit kingorna peqataasunit apeqquteqarusuttoqarluarpoq. Naalakkersuisut Siulittaasuata Naalakkersuisullu sinnerisa akisussaaffiannut tunngatillugu apeqqutigineqartut assigiinngisitaarluartut ilaatigut ukuupput:

- Ataatsitassarsiornermi oqaatsit atorneqartut.
- Pisinnaasut suliffimmik saniatigut suliffeqarsinnaanerat, soorlu takornarissanik angallassinikkut.
- Inuiaat avataanit tikittartut suliffeqarfinnik aallartitsisarnerisa ajornanngippallaarnera.
- Ilaqutariinnik ataatsimut katsorsaasarnissaq.
- Pinerluuteqarsimasunik isertitsiviit amingarnerat.
- Anorrip seqernullu nukinganik nukissiuteqarneq.
- Imminortartut amerliartornerat.
- Suliffissaaleqinerup partiinit kattuffinnillu suleqatigiissutiginissaa, tassunga ilanngullugu ataatsimiititaliamik pilersitsinissaq siunnersuutigineqarpoq.
- Atsitassarsiornermi politikki.
- Innarluutilinnut politikki.
- Meeqqat atuarfianni pissutsit.
- Aningaasanik isertitsissutissat nutaat.

Naalakkersuisut Siulittaasuat Aleqa Hammond:

"Innuttaasunik Qaqortumi Narsamilu ataatsimiisitsininni aggertut nuannaarutigaakka, peqataasullu assigiinngitsunik suliatsinnullu attuumassuteqartunik uummaarissumik apeqquteqaqattaarnerisa takutippaat, inuiaat kalaallit eqeersimaartuullutillu inuiaqatigiinni ingerlaarnitsinnut malinnaalluartut."

Aleqa Hammond nangilluni oqarpoq:

“Innuttaasunik ataatsimiisitsisarninni aggertartut tamarmik tikinneqartarnertik iluarisarpaat, inunnillu qanimut tikillugit naapeqateqartarnissaq Naalakkersuisunut pingaarutilerujussuuvoq, suliatsinni salliutilluinnangarput aammalu ingerlatiinnagassarput.”

Naalakkersuisut Siulittaasuata Kujataani angalanini naggaserlugu savaatillit ukiumoortumik ataatsimeersuarnerat ukioq manna Narsami ulluni 26. – 28. Juni 2014 pisoq ammarpaa.

SPS ataatsimeersuarnerani ammaanersiornermi oqalugiaat Naalakkersuisut siulittaasuat Aleqa Hammond Narsaq, juunip 26-at 2014