Suliassaqarfiup allanngortinneratigut suleqatigiinneq annerulersoq

Namminersorlutik oqartussani sulisut, pisortat suliffeqarfiini timitalinnik aningaasaqarnermillu pilersaarusiornermik suliaqartut juulip 1. 2014 aallarnerfigalugu qaninnerusumik ataqatigiilissapput.

Tamanna pissaaq Nuna tamakkerlugu Pilersaarusiornermut immikkoortortaqarfik Ineqarnermut Naalakkersuisoqarfimmit Aningaasaqarnermut Nunamullu Namminermut Naalakkersuisoqarfimmut nuuppat.

”Suliassaqarfimmik allanngortitsineq suleqatigiinnermik sunniuteqaqatigiinnermillu suli pitsaanerusumik pilersitseqataassaaq, suliassaqarfimmi siunissami sullissinermik, pilersaarusiornermik najoqqutaqarnermillu nukittorsaasumik", Aningaasaqarnermut Nunamullu Namminermut Naalakkersuisoq Vittus Qujaukitsoq oqarpoq.

Nunaminertanik atuineq imaluunniit nuna tamakkerlugu nunap immikkoortui assigiinngitsut sumut atorneqarnissaannik Nuna tamakkerlugu Pilersaarusiornermut immikkoortortaqarfiup suliarisarpai.

Namminersorlutik Oqartussat suliassaqarfiisa pilersaarusiorneri kommunit pilersaarutaannut ataqatigiisinnissaat immikkoortortaqarfiup aamma akisussaaffigai, taamatullu Asiaq - Misissueqqaarnerit immikkoortortaqarfiup ataaniilluni.

Nunaminertanik tunniussisarnerni kommunit aalajangiinerini Nuna tamakkerlugu Pilersaarusiornermut immikkoortortaqarfik aamma naammagittaalliortarfiuvoq.

Sulisut ullut tamakkingajallugit kommunit atassuteqarfigisarpaat pilersaarusiornermilu pisinnaatitaaffiit eqqarsaatigalugit kommunini illoqarfinnik pilersaarusiortunik, nunaminertalerisunik innuttaasunillu siunnersuisarnermi pingaarutilimmik inissisimasuullutik.

Nuna tamakkerlugu Pilersaarusiornermut immikkoortortaqarfik siunissami Nunamut namminermut immikkoortortaqarfimmik qaninnerusumik atassuteqalissaaq, pisortat suliassaat anginerusut soorlu suliassaqarfiit pilersaarusiorneri tassani isumagineqartarlutik.

Nunamut namminermut immikkoortortaqarfik aammattaaq Kommuninik Nakkutilliisoqarfimmut allatseqarfiuvoq taavalu aqutsinermut inatsisit eqqarsaatigalugit kommunit siunnersortarlugit.

Immikkoortortaqarfiit marluusut kommuninik qanimut suleqateqartuupput suleqatigiinnerullu annertusineranit sunniuteqatigiinnissaq naatsorsuutigineqarluni, sulisut amerlanerusut kommuninut tunngasorpiarnik ilisimasaqarnerulernerisigut paasisimasaqarnerulernerisigullu.

Suliassaqarfiup allanngortinnera pillugu itinerusumik paasissutissat Lone Nukaaraq Møller-imi, immikkoortortaqarfiup pisortaa, Aqutsisunut allattoqarfik, telefonnr. pissarsiarineqarsinnaapput. 34 51 12.