Siunnersuisoqatigiit ataatsimiinnera

Savaateqarfik

Nunalerineq pillugu Siunnersuisoqatigiit 33-saanik Narsami 25. juni 2014 ataatsimiinnera.

Siunnersuisoqatigiit ataatsimiinnerminni pingaarutilinnik eqqartukkaminni makku iluatsillugu avammut oqaaseqarfigerusuppai:

Siunnersuisoqatigiit tungaanniit Savaatillit Peqatigiissut Suleqatigiissut (SPS) aamma Neqi A/S-ip akornanni savanik, savaaqqanik nunalerinermilu tunisassiornermut tunngasunik ataavartumik imminnut attaveqaqatigiinnerulersimanerat tapersersorpaa. Aamma suleqatigiit akornanni savaatillit savaatilinngorniallu inuusuttut pillugit suliniummik aallartissimasaat Siunnersuisoqatigiit tungaanniit tamakkiisumik tapersersorpaat.

Siunnersuisoqatigiit maluginiarpaat savaatillit aamma Neqi A/S-illu akornanni qanimut suleqatigiittoqalernera taamaasiornikkullu neqileriffimmut savanik, savaaqqanik aamma nersussuarnik tunisassiassanik pilersuiniarneq aalaakkaasunngortinnissaa siunertarineqarmat, pisariaqartinneqartullu ukiumut 30.000 savaaqqat. Maanna ukiumut savaaqqat tunineqartartut 22.000 missaanniipput.

Siunnersuisoqatigiit inassutigaat Nunalerineq pillugu Ataatsimiititaliarsuup isumaliutissiissutaa inassuteqaataalu malitseqartinniarlugit suleqatigiissitamik pilersitsisoqarnissaa, taassumalu suliassat pingaarnerit pingaarnersiorlugit inissitsitissagaat:

i. Inatsisit nutarsarnissaannut pilersaarusiornissaq,
ii. Aningaasaliinissamut siunnersuusiornissaq aamma
iii. Nunalerinermik inuussutissarsiornermi aningaasartuutikillisaanissamut suliniutit qitiutinneqassasut.

Siunnersuisoqatigiit Naalakkersuisunut erseqqissaatigerusuppaa Nunalerineq pillugu Ataatsimiititaliarsuup isumaliutissiissutaata nutaajunera iluatigineqassasoq aammalu iliuusissat kinguartoorutiginagit sulisoqarnissaa.

Siunnersuisoqatigiit tullissaanik aggustip naalernerani ataatsimeeqqissapput, Nunalerineq pillugu Ataatsimiititaliarsuup isumaliutissiissutaa inassuteqaataalu Ataatsimiititaliap siulittaasuanit Palle Høy-mit saqqummiunneqassaaq.
Nunalerineq pillugu Siunnersuisoqatigiit sinnerlugit

Niels Lund
Siulittaasoq