Tassa peqataatitsineq!

Ilinniartitaanermi tamani peqataatitsinerup pitsanngorsarneqarnissaa Naalakkersuisut Ilinniartitaanermut periusissiami pilersaarummilu siunnersuutigaat. Ilinniarnerit ineriartortinneqassapput, taamaalilluni meerartatta inuusuttortattalu meeqqat atuarfianni atuartillutik ilinniarfinnulluunniit qinnuteqaraangamik piginnaasaat pisariaqartitaallu assigiinngissutaat assigiinngiiarnerallu inissaqartinneqarsinnaaniassammata.

Naalakkersuisoq Nick Nielsen tassunga atatillugu oqarpoq: ”Inuit akornanni peqatigiinnernit avataaniititsineq kiserliortitsilersarpoq nikallortitsisarlunilu. Allat avatangiisittalu peqatigineranni ilikkagaqartarpugut ineriartorlutalu. Innuttaasut tamarmik inuioqatigiit inuuneranni peqataanissamut periarfissaqarnissaat Naalakkersuisut kissaatigaat. Innuttaasut kikkulluunniit allaanerunertik, innarluuteqarnertik ajornartorsiuteqarnertilluunniit pissutigiinnarlugu immikkoortitaanermik misigisaqassanngillat. Taamaammat ilinniarfitsinni peqataatitsinermi siunertaavoq innuttaasut isumaqartumik peqataatinneqarnermikkut peqataanermikkullu inuiaqatigiit inuuneranni peqataanissamut periarfissaqarnissaat. Allatut oqaatigalugu inuit tapersiivissamut nuutsinnagit tapersiineq inunnut nuutsissavarput. Akerlianik kikkut tamarmik qanorluunniit iliorluni peqataatinneqarnissaat pineqanngilaq. Peqataatitsineq taamaallaat ilinniartut inuusuttulluunniit pisariaqartitaannut iluaqutaassappat pisassaaq. Taamaammat Teknikkimik Ilinniarfiup, KTI-p, inuusuttut atuarnermik allannermillu ajornartorsiuteqartut ilinniagaqarnissamik neqeroorutiminni peqataatinneqarnissaat aammalumi ilaatigut teknologi nutaaliaasoq atorlugu ilinniartitsinerminnik soraarummeertitsisarnermillu aaqqissuussinerat taamaalilluni inuit allatut piginnaasaqartut pisariaqartitaqartullu ilinniagaqarnissamik takorluukkaminnik piviusunngortitsisinnaalernissaat pillugit nutaarsiassaq Naalakkersuisut iluarisimaaqalugu tiguaat.”

Nick Nielsen nangippoq: ”Krister Støvlbæk Naalakkersuisut ukiaq ilinniartitaaneq pillugu workshopeqartitsineranni arfiniliusuni ataasiarluni peqataavoq, tassani naqinnernik ilisarinnissinnaannginnermini unammilligassani aporfissanilu uummaarissumik oqaluttuaralugit. Krister anguniakkani anguniarlugit akiuunnikooqaaq, aammalu piumassuseqarnera nutaamillu sammisaqarusunnera takutitai ajasoorutigaakka. Teknikkimik Ilinnarfiup suliniutai pillugit aamma annertuumik nersualaarpara. Inuusuttunut immaqa piginnaasaqalerfiusumik ilinniarnissamut periarfissaqanngikkaluartunut iluaqutaasumik nutaamik eqqarsarneq allatullu iliuuseqarsinnaaneq iluaqutaasut takutitsipput. Taamaalilluni ilinniarfitsinni inuusuttut sanngiiffii isiginiarnagit periarfissaat nukittuffiilu isiginiarneqarmata inuusuttullu pisariaqartitaannut naleqqussakkamik ilinniartitsinissamik neqerooruteqarneq peqataatitsineruvoq. Ilinniarfiit allat malinnaanissaat sulissutigissavara, taamaalilluni inuiaqatigiit assigiinngissutsinik akuersaarnermillu inissaqartitsisut ataatsimoorluta siuarsarniassagatsigit.”

Nick Nielsen naggasiivoq: ”Synscenter Refsnæsip suleqataasalu atortoq kalaallisut oqaasertaliisinnaasoq – allakkanik oqaasinngortitsisinnaasoq naammassingajalerpaat. Ilimagineqarpoq qarasaasiakkut atortorissaarut ukiamut avammut saqqummiunneqassasoq, neriuutigaaralu inuit amerlanerusut atuarnermik allannermillu ajornartorsiuteqartut ulluinnarni ajornannginnerusumik inuuneqalernissaannut ikiuutaassasoq, tamannalu aqqutigalugu inuunermi inuttut anguniakkat amerlanerusut piviusunngortinnissaannut periarfissinneqassasut.”