Nunani Avannarlerni ministerit suleqatigiit Islandimi

Nunani Avannarlerni Suleqatigiinnermut Naalakkersuisoq Kim Kielsen ministerit suleqatigiit Islandimi juunip 25-ianni 26-iannilu ataatsimiinneranni peqataassaaq.

Nunani Avannarlerni suleqatigiinnermi nutarterinermut tunngasut oqallinnermi qitiussapput.

Ataatsimiinnermi ministerit suleqatigiit assigiinngitsunik aalajangiissasut naatsorsuutigineqarpoq, Nunat Avannarliit Ministeriisa Siunnersuisoqatigiivisa suleriaasiannik allannguisussamik. Tamanna pivoq ministerit februaarimi ataatsimiinnerminni anguniakkanut oqariartuutaasa malitseqartinneqarnissaat pillugu.

Anguniakkanut oqariartuutini tikkuarneqarpoq nunani avannarlerni suleqatigiinnerup ersarinnerunissaa pisariaqartoq, taamaaliornikkut Nunat Avannarliit malunnartinneqarniassammata nunarsuup immikkoortortaatut nutaanik ilisimasanik inuiaqatigiit iluaqutissaannik sulissuteqartutut siuarsaasut. Taamaattoqassappat Nunani Avannarlerni killeqarfinnik aporfeqartarnerup nungutinnissaanik sulinerup sakkortusarnissaa.

Nunani avannarlerni suleqatigiinneq suli nutarterneqartuassaaq qularnaarniarlugu siunissaq ungasinnerusoq eqqarsaatigalugu nunani avannarlerni naalakkersuisut naalakkersuinerminni unammilligassaat nutaat pillugit suliarinissaannut sakkussaqarnissaat. Nalunaarusiami «Nytt Norden» Nunat Avannarliit Ministeriisa Siunnersuisoqatigiivisa allattaata Dagfinn Høybråten-ip nunani avannarlerni suleqatigiinnermut tunngasunik 39-nik siunnersuuteqarpoq. Nalunaarusiami siunnersuutit aallaavigalugit ministerit suleqatigiit suleriaatsimik allannguussutissanik tigussaasunik nutarterinermut tunngasunik oqallisissapput.

”Nunat tamalaat akornanni sulinerni tamani pappiararsorneq, allakkiorneq, nassuiaasiorneq il.il. pisariaqarput, kisianni taakku ilarujussui sulineq aaqqissorluarutsigu suleqatitsinnut suliakkiutigisinnaavagut. Aaqqissuusseqqinnermi pingaarnerit tassaassapput aalajangiiniarnerni aqqutissat ikinnerit, nunat tamat akornanni tunngasunik suleqatigiinnerup annertusarnera kiisalu ataatsimoorussanik suliniutini suliassaqarfinnilu ingerlatsinerni tamanut iluaqutaassussanngortinnissaat.

Allattaanerup nalunaarusiaa ”Nyt Norden” aaqqissuussaanermik allannguiniarnermut taamaattumut misiliineruvoq. Taamaaliornikkut naalakkersuinikkut oqallinnerit aalajangiinerillu inissaminniilissapput; tassa uagut suliamut atatillugu qinigaasugut”, Nunani Avannarlerni Suleqatigiinnernut Naalakkersuisoq Kim Kielsen oqarpoq.

”Nutarteriniarnerput iluatsissappat imaalissaaq, tassalu uanga Naalakkersuisunilu suleqatikka ministerit siunnersuisoqatigiivini qulinik allartitaqartut naalakkersuisuuffitsinni naalakkersuinikkut tunngasunik oqalliseqataasalissaagut. Suleqatigiinnermi ministerit nunat uatsinnut qanitarisatta suleqatigineri pillugit kiisalu Nunani Avannarlerni issittoq pillugu ataatsimoorluta qanoq sunniuteqarfiginerulernissaat pillugit oqalliffiginissaat qilanaaraara”, Kim Kielsen naggasiivoq.