Aallartitaq nutaaq

Ny italiensk ambassadør

Italiamiut aallartitaata nutaap Naalakkersuisut Siulittaasuat pulaarpaa

Ulluni makkunani italiamiut Københavnimi aallartitaat nutaaq siullermeerluni Nunatsinnut tikeraarpoq. Aallartitap angalanini Ilulissani 16. aamma 17. juni aallarnerpaa, kiisalu 18. aamma 19. juni Nuummiilluni Naalakkersuisut Siulittaasuannillu ataatsimeeqateqarluni. Ataatsimeeqatigiinnermi Nunatta Italiallu suleqatigiissinnaanermut periarfissai eqqartorneqarput, tassanilu aallartitap ilisimatusarnikkut suleqatigiinnermik, illoqarfikkaartumik ikinngutigiittut attaveqatigiinnissamik, piginnaasaqqortussuseqarnerup annertusarnissaanik, kulturimik ilinniartitaanermik minnerunngitsumillu takornariaqarnermik soqutigisaqarnini takutippaa.

Aleqa Hammond oqarpoq:

”Aallartitamik Queirolo Palmasimik siullermeerlunga ataatsimeeqateqarnera pitsaasumik ingerlavoq. Italia EU-mut attaveqarnitsinnut atatillugu suleqatigaarput Nunatsinnut pingaarutilik. Italiap siorna Issittumi Siunnersuisoqatigiinni alaatsinaattutut inissisimalernerata kingorna Italiamut attuumassuteqarnerput suli annertunerusumik pingaaruteqarnerulerlunilu aallutassaanerulerpoq. Italiap suleqatitut pingaarutilittut suli pingaaruteqarnerulernera attuumassuteqarnittalu aallutassaanerulernera iluatungeriilluta suleqatigiinnissatsinni qularnanngivissumik suli annertunerusumik misissugassaassaaq.
Aallartitamik ataatsimeeqateqarnera iluatsillugu, Nunatta Issittumi suleqatigiissutai Nunarsuarmilu Arfanniarnermut Kattuffissuaq immikkut ittumik taavakka. Nunatsinnut pingaaruteqartoq tassaavoq, Nunatsinni arfanniartarnerup piujuaannartitsinissamik tunngaveqarluni ingerlanneqarnera arfattassiissutigisartakkattalu ilisimatuussutsikkut tunngaveqarluni aalajangersarneqartarnerat”.