Nunavummiut tikeraalerput

Nunavummiut 30. juni – 4. juli Kalaallit Nunaannut tikeraalerput

Nunavummit aallartitat Nunavummi Naalakkersuisunut Siulittaasortik Peter Taptuna taavalu Nunavummi Ilinniartitaanermut Naalakkersuisoq Paul Quassa siulersortigalugit ullumini 30. juni – 4. juli Nuummiissapput.

Tikeraarnerminni Nunavummi Naalakkersuisunut Siulittaasortik Peter Taptuna ilaatigut uku naapissavai: Naalakkersuisunut Siulittaasoq Aleqa Hammond, Aalisarnermut, Piniarnermut Nunalerinermullu Naalakkersuisoq Finn Karlsen taavalu Royal Greenland.

Nunavut Kalaallit Nunaatalu suleqatigiinnerata pioreersup nukittorsaqqinnissaa tikeraarnerup siunertaraa. Suleqatigiinneq ukioq 2000-mi pilersinneqarpoq Suleqatigiinnissamut Nalunaarummik atsiornikkut.

Ataatsimeeqatigiinnermi ilaatigut sammineqassapput aningaasaqarnikkut taavalu isumalluutitigut ineriartorneq, aalisarnikkut piniarnikkullu suleqatigiinneq. Eqqartorneqassaartaaq EU-p puisit amiinik nioqqutissianik eqqusseqqusinnginnera taavalu aatsitassat pillugit ilinniartitaanikkut suleqatigiinnerup nukittorsaqqinneqarnissaa.

Nunavummi Naalakkersuisunut Siulittaasortik Peter Taptuna taavalu Naalakkersuisunut Siulittaasoq Aleqa Hammond Julip 2-ni ataatsimoorlutik nalunaarummik atsiuissapput.

Nunavummi Ilinniartitaanermut Naalakkersuisoq Paul Quassa ilaatigut Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfimmi ataatsimiissaaq taavalu Ilimmarfik takornariarfisissallugu. Taamatuttaaq Ilinniartitaanermut Naalakkersuisoq Sisimiunukassaaq. Sisimiunilu Aatsitassalerinermik Ilinniarfik taavalu Knud Rasmussen Højskolia takornariarfigissallugit.

2. juli 2014 tusagassiortunut katersuutsitsisoqassaaq. Piffissaa kingusinnerusukkut nalunaarutigineqarumaarpoq.