Periarfissat oqallisigaat

MR SAM

2015-imi nunani avannarlerni ataatsimoorluni suliniuteqarnissamut periarfissat Kalaallit Nunaata, Savalimmiut aamma Danmarkip oqallisigaat

Nunani avannarlerni suleqatigiinnermut ministerit Islandimi ataatsimiinnerannut atatillugu Nunani Avannarlerni suleqatigiinnermut Naalakkersuisup Kim Kielsen-ip Savalimmiuni suleqatini, suleqatigiinnermut ministeri Annika Olsen aamma danskit suleqatigiinnermut ministeriat Carsten Hansen oqaloqatigai.

2015-imi Danmarkip Nunani Avannarlerni ministerit siunnersuisooqatigiivini siulittaasoqarfik tigummisussaavaa, tamatumalu kingunerisaanik Stockholmimi oktobarip qaammataani Nunani Avannarlerni Siunnersuisooqatigiit katerinnerannut siulittaasoqarfimmi pisussanut pilersaarummik saqqummiussinissaq Danmarkip akisussaaffigaa. Savalimmiut aamma Kalaallit Nunaat pisussanut pilersaarummut siornali siunnersuuteqaqquneqarput.

”Maani Islandimi suleqatigiinnermut ministerit ataatsimiinnerannut atatillugu, isumassarsiat danskit ministeriata suleqatigiinnermut ministerit ataatsimiinneranni suleqatiminut saqqummiussai pillugit, suleqatikka savalimmiormiu aamma Danmarkimeersoq oqaloqatigaakka. Pisussanut pilersaarut aatsaat Nunani Avannarlerni Siunnersuisooqatigiit oktobarimi ataatsimiinneranni tamanut saqqummiunneqassaaq, kisianni oqaatigisinnaavara isumaginninnermut, peqqissutsimut aalisarnermullu suliassaqarfimmut tunngatillugu Kalaallit Nunaannaata ilanngunniagaat Danmarkip suliap ingerlanerani tigoreermagit. Kalaallit Nunaat aamma Savalimmiut aalisarnermut suliassaqarfimmi immikkut suliniuteqarput”, ilisimatitsivoq Kim Kielsen.

Kalaallit Nunaat aamma Savalimmiut Danmarkip siulittaasoqarfimmik isumaginninnerata nalaani aalisarnermut tunngatillugu suleqatigiinneq pillugu suleqatigiipput, aammalu Islandip siulittaasoqarfimmut pisussanut pilersaarutaanut naapertuuttumik imaani uumassusilinnit aningaasaqarnermi siuarsaanissamut tunngatillugu immikkut suliniuteqarnissamik pilersaaruteqarlutik, kisianni tassani aallunneqassalluni Atlantikup avannaani aamma Issittumi imaani piujuartussamik aningaasaqarnikkullu siuariartortitsinissaq.

Siulittaasoqarfimmut pisussanut pilersaarummiipput ilaatigut politikkikkut anguniakkat siunnersuutillu arlallit, ministerit siunnersuisooqatigiivisa ataasiakkaat suliaqarfigisassaat, ilaatigullu suliniutinut siunnersuutit arlallit, siulittaasoqarfiup siunnersuuteqarfigisassatut pisinnaatitaaffigisai. Siulittaasoqarfimmi suliniutit taakkua inaarutaasumik akuerineqareerunik, ukiuni pingasuni aningaasalersorneqarnissaat qulakkeeriigaavoq.

”Carsten Hansen-ip, Danmarkimut nunani avannarlerni suleqatigiinnermut ministeriusup 2015-imi danskit siulittaasoqarfimmut pisussanut pilersaarutaannut tunaartassat pingaarnerit saqqummiummagit, nuannaarutigalugu paasivara atlantikup avannaani taamatullu issittumi suliniutit ilaatinneqartut. Aamma aappaagu marsip qaammataani Ilulissani nunani avannarlerni suleqatigiinnermut ministerit ataatsimeeqatigiinnissaat qilanaaraara ” naggasiivoq Kim Kielsen