Sanaqateqarluni illuliornissamut aningaasaliissutit 2014-moortut ilaneqarput

Inatsisartut Aningaasaqarnermut Akileraartarnermullu Ataatsimiititaliaata sisamanngornermi 5. juni 2014 aalajangiuppaa, aningaasaliissutit konto pingaarneq 87.72.22-miittut Nunaqarfinni isorliunerusunilu inissialiortiternermut pilersaarut, suliassap normua 998.35.024 Nunaqarfinni isorliunerusunilu inissialiornermi pilersaarut, 2014, 2014-mi 10,0 mio. kr.-inik ilaneqassasut.

- Assut naammagisimaarinnillunga paasivara illuliassat Illorput 2000 aammalu 2100-nut aningaasaliissutit amerlineqarnissaannik Naalakkersuisut qinnuteqaataat Inatsisartut Aningaasaqarnermut Akileraartarnermullu Ataatsimiititaliaata akuersaarsimagaa. Nalunngilara sanaqateqarluni illuliornissamik aaqqissuussineq aqqutigalugu nammineq illuutitaarnissaq soqutigineqarluartoq, aningaasaliissutillu amerlineqarnerisigut qinnuteqaateqartut suli amerlanerusut periarfissinneqassapput. Innuttaasut tamarmik pitsaasumik peqqinnartumillu angerlarsimaffeqarnissaannik Naalakkersuisut anguniagaannut alloriarneq qanilliallatsitsivoq.
- Namminersorlutik Oqartussat sinnerlugit sanaqateqarluni illuliornissamut tunngasunik allaffissornikkut isumaginnittuusoq A/S Inissiaatileqatigiiffik INI qinnuigineqassaaq periarfissat pillugit innuttaasunut ilisimatitseqqullugu, Ineqarnermut Naalakkersuisoq Siverth K. Heilmann oqarpoq.

Sanaqateqarluni illuliornissamut aningaasaliissutit amerlineqarnissaannik kissaateqarnermut tunngaviit ilagaat Inoqarfiit mikinerit pillugit ataatsimeersuarnerneq 23.-25. maj 2014 ingerlanneqartoq.