Kulturimut tapiissutinut – akissuteqarnissamut piffissaliussaq

EPI-imiit tusagassiorfinnut nalunaarummut 11. juni 2014-imeersumut tunngatillugu kulturikkut suliniutinut tapiissuteqartarnernut aaqqissuussinerit pillugit Naalakkersuisoqarfik imaattunik oqaaseqaateqassaaq.

Siullermik EPI-p nalunaarutaanut qujanaq. Soqutigisaqaqatigiittut kattuffimmik pilersitsiniarsimanerup siunertarerpiarpaa eqqumiitsuliornermik suliaqartut soqutigisaasa illersorneqarnissaat.

Naalakkersuisoqarfiup suliat ataasiakkaat oqaaseqarfiginianngilai, kisiannili pissutsit ataatsimut isigalugit.

Tipsernermiit Lottornermillu aningaasaliissutaasunit imaluunniit Namminersorlutik Oqartussat eqqumiitsuliornermut kulturimullu aningaasaliissutaanniit qinnuteqarnermi nalunaarsorneqarsimavoq naatsorsuutigineqassasoq minnerpaamik sapaatip akunneri tallimat qinnuteqaatit suliarineqartartut, aammalu Naalakkersuisoqarfiup Inatsisartut katersuunnerisa nalaanni allanillu suliaqarnerup nalaani nukiit killeqartut atugassarisarai. Agguaqatigiissillugulu akissuteqarniartarnermi piffissaq atorneqartartoq piffissaliussaasunut sanilliullugu sapaatip akunnerinik arfineq pingasunik sivisussuseqarsinnaasarpoq.

Taamaattumillu assut pingaaruteqartarpoq piffissaagallartillugu qinnuteqartarnissaq, imaanngitsoq aaqqissuussinissamut tunngatillugu piffissaq kingullerpaaq atorlugu. Tamanna minnerunngitsumik atuuppoq aaqqissuussinerit angalanernut amerlasuunut, suliaqartunut aammalu sumiiffilersuinermut annertuumut tunngasuusimagaangata. Qujanartumillu kulturikkut suliniutinik aaqqissuussisartut eqqumiitsuliortullu amerlasuut tamatumunnga pikkorilluinnartarput.

Sulianik sukkasuumik suliaqartarnermut atatillugu maanna qinnuteqaatit amerliartuinnartut tiguneqartalersut eqqarsaatigalugit aalajangiisuuvoq ilanngussassat pisariaqartut tamarmik piumasarineqartutut qinnuteqaammut ilanngunneqartarnissaat. - Kiisalu siusinnerusukkut aningaasaliissutaasimasunut naatsorsuusiat nalunaarusiallu maleruagassani piumasaqaataasut naapertorlugit suliarineqarsimanissaat. Taamaattoqanngippammi suliap suliarineqarnissaa kinguarsarneqassammat.

Naalakkersuisoqarfimmiit tapiissuteqartarnermik aaqqissuussinernut tamanut atuuppoq naatsorsuusiortussaatitaaneq, tapiissutigineqartut siunertamut atorneqarsimanerat isumannaarumallugu. Tapiissutaasut siunertaasumut atorneqarsimanngippata, imaluunniit naatsorsuutinik akuerineqarsinnaasunik suliaqartoqarsimanngippat, tapiissutaasut ilaat tamakkerlugilluunniit utertinneqarnissaat piumasarineqarsinnaavoq. Pissutsit tamakkua naammasillugit suliarineqarsimanngippata suliniutinut nutaanut tapiissuteqartoqarsinnaanngilaq.

Kattuffiit, peqatigiiffiit, nammineerlutillu suliniuteqartartut amerlasuut nersualaartariaqarput piffissaliussamut eqqortumillu pisariaqartunik nalunaarusiortarmata, taamalu allaffissorneq pisariinnerulersittarlugu, aningaasaliissutaasullu siunertaasunut atorneqarsimanerat taamaasillutik qulakkeertarmassuk.

Naalakkersuisoqarfimmut siunertaavoq pitsaasumik naapertuilluartumillu qinnuteqartunik tamanik sullissisarnissarput, aammalu kulturikkut suliniutit pitsaasut amerlasuullu aallartinneqartarnissaat.

Naalakkersuisoqarfiup ukiuni kingullerni ataatsimoorussamik paasissutissiiffiusumik ataatsimiititsisarneq qinnuteqarnermi periaasiusunut tunngatillugu atugarilersimavaa, maannalu sulissutigineqarpoq qinnuteqaatit elektroniskiusumik tunniunneqartalersinnaanerat, ilaatigullu EPI suleqatigalugu, periaatsit suli amerlanerusut pitsaanerusullu aqqutissiuunniarneqarput, kulturikkut suliniuteqartut eqqumiitsuliortut aammalu suliniutinik pilersitanillu tamakkuninnga nuannaaruteqartartut tamaasa eqqarsaatigalugit.