Sanaat, kigutilissuarmiit pinngortut, niuerutigineqarnissaat inerteqqutaavoq

Sisimiut eqqaanni kigutilissuup toqungasup nassaarineqarneranut atatillugu Aalisarnermut, Piniarnermut Nunalerinermullu Naalakkersuisoqarfik aamma Avatangiisinut Pinngortitamullu Naalakkersuisoqarfik ilisimatitsissaaq:

  • Kalaallit Nunaata aalisarnikkut oqartussaaffigisaani § 2 naapertorlugu kigutilissuit eqqissisimatitaalluinnarput.
  • Arfernik angisuunik illersuineq piniarnerlu pillugit Namminersorlutik Oqartussat nalunaarutaat nr. 4, 7. februar 2013-imeersumi § 36 naapertorlugu arferit angisuut taamatuttaaq kigutilissuit neqaa avammut anninneqarnissaa/ eqqunneqarnissaa inerteqqutaavoq.

Tassa imaappoq, arfeq taanna piniaqqusaanngilaq, aamma imaani kigutilissuarmik toqungasumik nassaartoqartillugu imaluunniit silulisoqartillugu tamanna najukkami piniarnermik aalisarnermillu nakkutilliisumut imaluunniit Aalisarnermut, Piniarnermut Nunalerinermullu Naalakkersuisoqarfimmut nalunaarutigineqassaaq. Aammalu kigutilissuaq tamakkerlugu kigutai ilanngullugit Namminersorlutik Oqartussanit pigineqarpoq, ajornanngippallu arsaarinnissutigineqassalluni.

Tamatuma saniatigut kigutilissuaq CITES-ip allattorsimaffiutaani 1-imi allattorsimasunut ilaavoq. APN-ip eqqaasitsissutigerusuppaa, eqqissisimatitaalluinnartunik kigutilissuaq ilanngullugu tuniniaaneq inerteqqutaammat. Inerteqqutaanera Pinngortitamik illersuineq pillugu Inatsisartut inatsisaat nr. 29, 18. december 2003-meersumi aalajangersarneqarsimavoq, tassani atuarneqarsinnaavoq, eqqissisimatitaalluinnartunik ilaannaanilluunniit assersuutigalugu kigutilissuup kigutai tamaasa imaluunniit kigutilissuup kigutaanit kusanartulianik niueruteqarneq inerteqqutaasoq. Taamaattoq sanaat, 2003-mi Inatsisip atulinnginnerata siornatigut pigineqareersimasut, uani inerteqqutigineqarnermi atuutinneqanngillat.