Soraarummeertortagut, tamassi pilluaritsi – juni 2014

Nick N 2 Nunatsinni aasaq qamanngavik nuannariuaannarsimavara, - seqernup kissarnera, qaqqagut qorsooqqissisut, uagullu maani najugaqartugut silami sammisassanut katersuuttarnigut, illoqarfitsinni - asimilu, inuunerup nuannissusianik qiimmattarnermillu pilersitsisartut. Ukiunilu kingullerni uanga Ilinniartitaanermut Naalakkersuisutut inuit amerlasuut, - inuusuttuunerusut juunip naalernerani illoqarfitta ilarpassuini ersarissisartut assut nuannaarutigisarpakka. Tassanilu eqqarsaatigaakka inuusuttortagut nunatsinni ilinniarfinniit soraarummeerlutik naammassisut, assigiinngiiaartunik nasaqarlutik ersersitsisartut, inuunerminni alloriarnermik pingaaruteqaqisumik alloriarlutik, - ilinniagaqarnermikkut.

Sapaatip akunnerani uani isiginnaartitsisartutut ilinniagaqartut sisamat nunatta isiginnaartitsisartutut ilinniarfianiit Nuummi soraarummeerput, amerIallutalu isiginnaarpagut soraarummeerutiminnik pingasunngormat unnukkut isiginnaartitsisut, Nuummi nunatta isiginnaartitsisarfittaavani Industrivejimiittumi. Tassungalu atatillugu pissanganarpoq ”soraarummeerfimmi” namminermi peqataalluni, nalinginnaasumimmi soraarummeersimanermut uppernarsaatit tunniunneqarneranni taamaallaat peqataasarpugut, soorlulimi aamma tamanna ingerlanneqartoq, pingasunngormat isiginnaartitsisoqareernerata kingorna nalliuttorsiorpalaartumik katerisimaarnermi.

Ilissi tamassi, piffissami matumani soraarummeernissinnut allagartartaartusi, GU-mi allagartartaartusi, inuussutissarsiutinut ilinniartitaanerni allagartartaartusi, Ilisimatusarfimmi allagartartaartusi - imaluunniit immaqa Danmark-imi nunaniluunniit allani tamanna pippat, - ilissi tamassi tulluusimaarutigisinnaavarsi unammilligarsi naammassigassiuk. Ilinniagaqassagaannimi nukissaqartariaqarpoq, piumassuseqartariaqarpoq, minnerunngitsumillu inunnit qanitarisanit, ilaquttanit, ikinngutinit minnerunngitsumillu ilinniarfinni ilinniartitsisuusunit tapersersorneqarneq pisariaqarpoq. Taamaattumik, tamassi ilaquttasilu qamannga pisumik pilluaritsi, soraarummeernermik naammassilluakkassinnik, qujanarlu ilinniarfiit sulilluarsimanerannut. Ilissi soraarummeertusi tamassi maligassiuisuuvusi, nunatsinni ilinniarsimassutsitta qaffasinnerulersinniarnerani, taamaattumik neriuutigaara, inuusuttoqatisi allat ilinniagaqarnissaannut qiimmassartassagisi.


Inussiarnersumik inuulluaqqusilluta


Nick Nielsen