Sukkorneq kingornussinnaavarput

Ilulissat

Ilisimatuussutsikkut misissuinerup sukkornermik nappaatillit amerlanerujussuinut patsisaasut ilaat nassuiaatissarsivaa

Ilisimatuussutsikkut misissuinerup sukkornermik nappaatillit amerlanerujussuinut patsisaasut ilaat nassuiaatissarsivaa.
Peqqinnanngitsumik inuuneqarnikkut pualavallaalerneq, nerisat peqqinnanngitsut timillu atunngippallaarnera, type 2-mik sukkornermik nappaateqalernissamut aalajangiisuusarpoq. Inuilli ilaasa allanut sanilliullutik inunnguutsiminnik sukkornermik nappaateqalernissamut qaninnerunerat, ilisimatusarnermi matumani ersersinneqarpoq.

Sukkornermik nappaateqalertarneq kingornuttagaasinnaasartoq ilisimaneqareerpoq. Maanna ilisimatusartut timip sananeqaataanik allaassutilimmik, nunatsinni innuttaasut akornanni type 2-mik sukkornermik nappaateqalersinnaanermut peqqutaasumik nassaarput. Tamanna nunatsinni innuttaasunik misissuinermit nalunaarusiami qanittukkut saqqummiunneqartumi atuarneqarsinnaavoq.

15% nassuiaatissaqartissinnaagaat
Gen-eq sananeqaat TBC1D4 nukiit sananeqaataasa sukkumik atuisinnaanerannut sunniuteqartartoq, maannamut taamaallaat kalaallini nassaarineqarpoq. Gen-ip taassuma nerereernermi sukkut nukinnukartussaagaluit annikinnerutittarmagit, aap akuata qaffasippallaartumik sukkoqalertarnerannik pissutaaqataasarpoq. Type 2-mik sukkulersimasullu 15% missaasa taassuminnga peqquteqarsinnaanerat nassuiaatissaqartilerlugu.

Nerisat timimillu aalatitsineq qitiutinneqartut
Peqqissutsimut Attaveqarnermullu Naalakkersuisoq Steen Lynge paasissutissat nutaat nuannaarutigivai: "Paasissutissat nutaat soqutiginarput. Sananeqaatitsinnit gen-eq, kinguaariinni amerlasuuni pigereersimasarput inooriaatitsinnik allanngortitsisimanitta malittaanik maannakkut erserpoq, ullumikkullu inooriaaseqaratta annerusumik sukkortunngorsinnaanermut ulorianartorsiortitsisumik. Peqqinnartumik inuuneqarnikkut
sukkortunngornissaraluit pinngitsoortissinnaavat, ukiuni marlunni tulliuttuni Inuuneritta II-mi inuiaat inuunerinnerulernissaannik anguniagaqarluta nerisat timimillu aalatitsineq immikkut sammisassatut qitiutippagut”.

Paasisat allaaserineqartut
Ilisimatusarnikkut paasisat atuagassiami assut ataqqisaasumi Nature-mi saqqummiunneqarnissaat Kalaallit Nunaanni Peqqissutsimik Ilisimatusarfimmi, Ilisimatusarfimmilu ilisimatuup Peter Bjerregaard-ip, ilaatigut Københavnip Universitet-iani Steno Diabetes Centerimilu ilisimatusartunik peqateqarluni, timip saneqaataanut tunngasunik ilisimatusarnermi annertoqisumi peqataasimasup ilisimatitsissutigaa.

 

Video
Københavns Universitet-imit nutaarsiassaq videotalik:
Forskere knækker genetisk kode for diabetes i Grønland

Nature
Paasisat Nature-imi saqqummiunneqarnerat:
A common Greenlandic TBC1D4 variant confers muscle insulin resistance and type 2 diabetes

Inuuneritta II
Peqqik.gl nittartakkami Innuttaasut peqqissuunissaannik suliniut Inuuneritta II

Sukkornermut tunngasut
Paasissutissat nittartakkami peqqik.gl sukkornermut tunngasut

 

 

Paasissutissat sukumiinerusut uannga pissarsiarikkit:
Steno Diabetes Center
Marit Eika Jørgensen
Mobil +45 3075 6008, e-mail: maej@steno.dk,

Nakorsatut siunnersorti Birgit V. Niclasen
Toqq. direkte: +299 34 66 07, e-mail: bivn@nanoq.gl