Naatsorsueqqissaartarfiup pisortaa Anders Blaabjerg suliinnassaaq

Anders Blaaberg-ip Naatsorsueqqissaartarfiup pisortaatut atorfeqaannarnissaa Naalakkersuisut isumaqatigiillutik aalajangiuppaat.

Naalakkersuisut 2. juni 2014-imi ataatsimiinnerminni Kaalaallit Nunaanni Naatsorsueqqissaartarfiup siulersuisuisa inassuteqarnerisigut Naatsorsueqqissaartarfiup pisortaata atorfeqarnerata ukiunik pingasunik sivitsorneqarnissaa aalajangiuppaat. ”Anders Blaaberg-ip 2010-mi atorfinikkamili suliarujussui iluatsilluartut tunuliaqutaralugit atorfeqartitsinerup sivitsorneqarnissaa siulersuisut isumaqatigiillutik aalajangiuppaat", Siulittaasoq Vøgg Nielsen Siulittaasullu Tullia Henrik Leth Naalakkersuisunut inassuteqaamminni taama allapput.

Aningaasaqarnermut Nunamullu Namminermut Naalakkersuisup Kalaallit Nunaanni Naatsorsueqqissaartarfiup attavigisaata siulersuisunit inassuteqaat nuannaarutigaa. "Isumaqarpunga kisitsisitigut paasissutissat pitsaasuusut suliassaqarfiillu Naatsorsueqqissaartarfiup suliarisartagai amerliartortut tamannalu minnerunngitsumik Anders Blaaberg-ip nersorneqaatigissavaa", Naalakkersuisoq Vittus Qujaukitsoq oqarpoq nangillunilu: "Kisitsisit Naatsorsueqqissaartarfiup katersortagai Naalakkersuisut nunatta siunissaanut aaqqissuusseqqitsillugit periusissialiortillugillu pinngitsoorsinnaanngilavut".

Anders Blaabjerg, cand.oecon.-itut ilinniarsimasoq 2010-mi decembarimiilli Naatsorsueqqissaartarfimmut pisortatut atorfinitsinneqarpoq. Tamanna sioqqullugu ilaatigut peqqinnissaqarfimmi Aningaasaqarnermut Pisortaasimavoq.

Naatsorsueqqissaartarfik aningaasaliissutit pisortanit tunniunneqartartut atorlugit kisitsisitigut paasissutissiortarpoq akilerneqarluniluunniit iminneqartarluni. Kisitsisitigut paasissutissat saqqummiussatigut aamma Ukiumoortumik Kisitsisitigut Paasissutissat ukiumut ataasiarluni saqqummersartoq aqqutigalugu tamanut saqqummiunneqartarput. Tamatuma saniatigut Naatsorsueqqissaartarfik namminersortunut pisortaniluunniit ingerlataqartunut sammisamik aalajangersimasumik erseqqissaasoqarnissaanik suliarinnittoqarnissaanillu kissaateqartunut sullissisarpoq.

Ukiumoortumik nalunaarut 2013-mut atuuttoq Kalaallit Nunaanni Naatsorsueqqissaartarfiup nittartagaani www.stat.gl aaneqarsinnaavoq.