Finn Karlsen: Atlantikup avannaa pillugu ilisimatusarfineqarneruli

NAFMC Ilulissat

- Erseqqissassavara Atlantikup avannaani tamarmi ilisimatusarnikkut suleqatigiinnerup annertusarneqarnissaa pingaaruteqarmat – imaani avatangiisinut, uumassusilinnut ilisimatusarnermut pisortallu ingerlatsinerinut tunngatillugu – pingaartumik ataatsimoorullugit aalisakkavut eqqarsaatigalugit. Taama Aalisarnermut, Piniarnermut Nunalerinermullu Naalakkersuisoq, Finn Karlsen, Atlantikup avannaani nunat aalisarnermut ministerisa Ilulissani Arcticimi pingasunngornermi ataatsimiinnerini oqarpoq.

Atlantikup avannaani nunat aalisarnermut ministerii Hotel Artcimi ataatsimiinnertik pingasunngornermi aallartippaat, ataatsimiissutaasa qulequtaat tassaalluni silap allanngornera. Ataatsimiinermi nunat peqataatitaqartut, tassaasut Savalimmiut,Norge, Rusland,EU, Island aamma Canada, nunaminni silap allanngutai pillugit saqqummiusisaqartartoq, peqataasut saqqummiussat pillugit kingorna oqaluuserisinnaallugit.

- Silap allanngorneranut atatillugu issummasi misilittakkasilu tusarusuppakka, aamma tamatuma nassataanik suut periarfissaalersimanersut suullu unammilligassaalersimanersut tusassallugit pissanganarpoq, Finn Karlsen tikilluaqqusinermini oqarpoq.

Atlantikup avannaani nunat aalisarnermut ministeriisa ataatsimiinnerini pituttuisumik isumaqatigiissusiortoqarneq ajorpoq, ministerilli isumamminnik saqqummiisinnaasarput oqallittoqarlunilu.

Ataatsimiinneq ataatsimut nalunaaruteqarnermik ullumi naggaserneqassaaq, nunat peqataatitaqartut aalisarnermut tunngasumik isumamminnik saqqummiussissallutik.



Assip oqaasertassaa: Assimi takuneqarsinnaapput aalisarnermut ministerit alapernaarsummut Knud Rasmussenimut ilaasut.



Assip oqasertassaa: Ataatsimeeqataasut Sermermiunut nassuiaasulerlutik takorniartinneqarput.



Assip oqaasertassaa: Assimipput, saamerlernit: Jacob Vestergaard, Savalimmiuni aalisarnermut ministeri, Elisebeth Aspaker, Norgemi aalisarnermut ministeri, Aalisarnermut, Piniarnermut Nunalerinermullu Naalakkersuisoq, Finn Karlsen, Islandip aalisarnermut ministeria, Sigurour Ingi Johannsson, Ruslandip aalisarnermut ministeriata tullia, Ilia Shestakov aamma Tom Rosser, Canadap aalisarnermut Naalakkersuisoqarfiata pisortaata tullia.

Uani Aalisarnermut, Piniarnermut Nunalerinermut Naalakkersuisup Finn Karlsenip oqalugiaataa uani atuarsinnaavat