Nunavummiut Nuummut tikipput

Naalakkersuisut Siulittaasuata Aleqa Hammondip Nunavummit tikeraartut; Nunavummi Naalakkersuisunut Siulittaasuat Peter Taptuna, nulia, taavalu Nunavummi Ilinniartitaanermut Naalakkersuisoq Paul Quassa atorfilittallu Nuummut 30. juni 2014 ualilluinnartoq tikimmata tikilluaqquvai. Nunavummiut Nuummiissapput juulip sisamaata tungaanut.

Nunavummi Naalakkersuisut Siulittaasuata Peter Taptunap tikeraarnermini ataatsimeeqatigissavai Naalakkersuisunut Siulittaasuat Aleqa Hammond, Aalisarnermut, Piniarnermut Nunalerinermullu Naalakkersuisoq Finn Karlsen aamma Royal Greenland.

Nunavut Kalaallit Nunaatalu suleqatigiinnerata pioreersup nukittorsaqqinnissaa tikeraarnerup siunertaraa. Suleqatigiinneq ukioq 2000-mi pilersinneqarpoq Suleqatigiinnissamut Nalunaarummik atsiornikkut.

Ataatsimeeqatigiinnermi ilaatigut sammineqassapput aningaasaqarnikkut taavalu isumalluutitigut ineriartorneq, aalisarnikkut piniarnikkullu suleqatigiinneq. Eqqartorneqassaartaaq EU-p puisit amiinik nioqqutissianik eqqusseqqusinnginnera taavalu aatsitassat pillugit ilinniartitaanikkut suleqatigiinnerup nukittorsaqqinneqarnissaa.

Nunavummi Naalakkersuisunut Siulittaasortik Peter Taptuna taavalu Naalakkersuisunut Siulittaasoq Aleqa Hammond Julip 2-ni ataatsimoorlutik nalunaarummik atsiuissapput.

Nunavummi Ilinniartitaanermut Naalakkersuisoq Paul Quassa ilaatigut Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfimmi ataatsimiissaaq taavalu Ilimmarfik takornariarfisissallugu. Taamatuttaaq Ilinniartitaanermut Naalakkersuisoq Sisimiunukassaaq. Sisimiunilu Aatsitassalerinermik Ilinniarfik taavalu Knud Rasmussen Højskolia takornariarfigissallugit.

2. juli 2014 nal. 15:30 Hans Egedep illuani tusagassiortunut katersuutsitsisoqassaaq.