Great Greenlandimut ukioq imaannaanngitsoq

Pingasunngormat 25. Juni 2014 nal. 10.00 Great Greenland A/S-imi nalinginnaasumik ataatsimeersuartoqarpoq.

Ilaatigut ingerlatseqatigiiffiup ukiumoortumik nalunaarusiaata akuerineqarnissaa oqaluuserisassaniippoq.

Ukiumoortumik nalunaarummi atuarneqarsinnaavoq 2013-imi sinneqartoorut DKK 5,9 mio. kr.-iusut.

Ukiumili angusat mianersortumik tiguneqassapput, tassa Great Greenlandip siusinnerusukkut suleqatigisimasaanut eqqartuussivilersuunneqarniarnera suli aalajangiiffigineqannginnera pissutigalugu. Tassani Great Greenland DKK 32 mio-nik piumasaqaateqarpoq.

Piumasaqaat taanna ukiumoortumik nalunaarusiamut ilanngunneqarsimanngitsuuppat Great Greenland DKK 26,6 mio-nik amigartooruteqarsimassagaluarpoq.

Naalakkersuisunit Great Greenlandimilu inernerusoq naammaginartinneqanngilaq, tamannalu maanna suleqatigiunnaakkamit North Atlantic Fur Group ApS-imit isumaqatigiinnginnermik peqquteqarpoq.

WTO-p Great Greenland-imut sunniutaa

Puisinit tunisassianik EU-p eqqusseqqusinnginnera pillugu WTO-p eqqartuussivikkut aalajangiinerata kinguneri Great Greenlandip siunissami unammilligassaasa ilagaat. Tassani pineqartoq tassaavoq EU-p Inuit immikkut isiginiarlugit aalajangiisimagaluarnera, Kalaallit Nunaannut aamma iluaqusiigaluartoq, maannali isikkumigut inatsisinik unioqqutitsisoq.

Danmark ataqatigiissaaqatigalugu Naalakkersuisut suliniutigaat EU-p puisinit tunisassianik inerteqquteqarnerani Inuit immikkut isiginiarneqarnerisa attatiinnarnissaa, taamaaliornikkut Danmarkimut Europamilu niuffaffiit sinnerinut eqqussuisoqaannarniassammat. Taamaalereerpat puisinit nioqqutinik inerteqqutip niuffaffinnut aseruisimanera aaqqissuunneqaqqinneqarsinnaalissaaq.

Sanilerput Canada suleqatigineqalerpoq, puisit amii pillugit Naalakkersuisut isumaqatigaat suliniutigineqarporlu Kalaallit Nunaat Nunavullu siunissami ataatsimoortumik oqariartuuteqartarnissaat.

Naalakkersuisut Great Greenland qanimut suleqatigalugu puisit amii niuffaffinni allani nittarsaallugit suli suliaqarput, ilaatigut Asiami.

Puisit amiinik eqqusseqqusinnginneq Naalakkersuisut pingaartitaasa ilagaat taamaattumillu tamanna siullertut Kalaallit Nunaata EU-mik oqaloqateqaleruni qaqilissamaarpaa Europakommissioni nutaaq 1. November 2014-imi atuutilerpat.

Siulersuisunik taarsiineq

Ataatsimeersuarnermi Great Greenlandimi siulersuisuni nutaat Dorthea Rødgaard, Erik Sivertsen aamma Annette Kreiner tikilluaqquneqarput.

Tassungalu atatillugu aamma siulersuisuni ilaasortaasimasut Nauja Bianco, Mike Nicolaisen aamma Karen Simonsen inuulluaqquneqarput.

Siulersuisuni siulittaasoq Bruno Olesen siulersuisunut siulittaasutut qinigaaqqippoq.

"Naalakkersuisut sinnerlugit Great Greenland A/S 2013-imi suleqatigiilluarsimanitsinnut qutsavigerusuppara. Ukiuni kingullerni ingerlatseqatigiiffimmut aningaasarliorsimanerup kingorna Kopenhagen Furimik isumaqatigiissut iluaqutaajumaartoq neriuutigaara. Ingerlatseqatigiiffimmut piffissami imaannaanngitsumi siulersuisunut ilaasortat tunuartut sulilluarsimapput. Naalakkersuisut taakkuninnga nersorinninnerat sulinerannullu qujassutaat apuukkusuppara," Aleqa Hammond oqarpoq.