Ilaqutariinnut sullissiviit amerlanerulersimapput

Martha Lund Olsen-ip nuannaarutigaa illoqarfiit amerlanerusut ilaqutariinnut sullissivinnik pilersitsisimanerat, taakku ilaqutariinnut aamma meeqqaanut inuusuttunullu suliniuteqarnerup pitsanngorsarnissaannut peqataasinnaapput.

2006-imi Naalakkersuisut immikkut ittumik suliniuteqarneq aallartippaat ilaatigut anguniagaralugu ilaqutariinnik sullissinerup nukittorsarneqarnissaa, aaqqissuussinerillu ilagaat ilaqutariinnut sullissivinnut tapiissuteqartarneq.

2013-imi siunertamut aningaasat immikkoortinneqarsimasut qaffanneqarput, tamatumalu kingunerisimavaa kommunit ilaqutariinnut sullissivinnik amerlanerusunik pilersitsisinnaalernerat.

2014-imi Ilaqutariinnermut Naalakkersuisoqarfik, ilaqutariinnut sullissivinnut 11.743.000 kroninik tapiissuteqarpoq.

Martha Lund Olsen-ip nuannaarutigaa illoqarfiit amerlanerusut ilaqutariinnut sullissivinnik pilersitsisimanerat, taakku ilaqutariinnut aamma meeqqaanut inuusuttunullu suliniuteqarnerup pitsanngorsarnissaannut peqataasinnaapput.

"Inuuniarnikkut ajornartorsiuteqarpoq, tamakku kingunerisarpaat ilaqutariippassuit ulluinnarni inuunerminni ilungersunartunik atugaqarlutik inuusarnerat, tamakkulu meeqqat inuusuttullu ilaannut alliartornermi atugarissaarnikkut ajornartorsiortitsisarnerat. Siunertaasoq tassaavoq, ilaqutariinnut sullissiviit sulinerisa nukittorsarnissaannut siammarternisaannullu peqataaqataanissaq, taakkunani meeqqanut inuusuttunullu immikkut ittumik suliniuteqartoqartarpoq. Taamaattumik nuannaarnarpoq ilaqutariinnut sullissiviit nukittorsarneqarnissaannik anguniagaq anguneqarsimammat. Peqatigitillugu piffissamut sivisunerusumut anguniagaavoq ilaqutariinnut eqqorneqartunut sulinerup pitsaanerusumik ataqatigiissaarneqarnissaa, taamaasilluni najukkani suliniutit isumaginnittoqarfiup, ilaqutariinnut sullissiviit aamma qimarnguiit akornanni suleqatigiinnerunissaq nukittorsarneqarluni".

Ilaqutariinnut Inatsisinillu Atuutsitsinermut Naalakkersuisoqarfiup akisussaaffigaa meeqqanut inuusuttunullu immikkut ittumik suliuniuteqartoqarnissaa, kommuninullu tapiissuteqartarnissaq taakkua ulluinnarni ilaqutariinnut sullissivinnik ingerlatsisuusut.

Ullumikkut illoqarfiit tulliuttut ilaqutariinnut sullissiveqarput; Qaanaaq, Upernavik, Ilulissat, Qasigiannguit, Qeqertarsuaq, Kangaatsiaq, Aasiaat, Sisimiut, Maniitsoq, Nuuk, Paamiut, Qaqortoq, Narsaq, Nanortalik aamma Tasiilami ilaqutariinnut sullissiviit. Qaasuitsup kommuniata pilersaarutigaa Uummannami ataatsimik pilersitsisoqarnissaa.

Paasisaqarnerorusukkuit Upaluk Poppel attavigisinnaavat E-mailimut: uppo@nanoq.gl oqarasuaammullu 34 50 02-mut Ilaqutariinnermut Inatsisinillu Atuutsitsinermut Naalakkersuisoqarfimmi AC-fuldmægtigimut.