Nunarput nammineerluni killeqarfimmik nakkutiginnilerpoq

Aalisakkanit nioqqutissiat aalisariutinit nunanit allaneersunit, soorlu Canadameersunit Ruslandimeersunillu nunatsinnut apriilip tallimaata kingorna tulaassaat, nunatsinni killeqarfittut akuerisaasumik misissuivinni, Nuummi Sisimiuniluunniit misissorneqartalerput.

Ålborgip umiarsualiviani killeqarfimmik nakkutilliisartoq, Kastrupimi mittarfimmi umiarsualivimilu killeqarfimmik nakkutilliisartoq Kalaallit Nunaannilu Uumasut Nakorsaqarfimmi Inuussutissalerinermilu Oqartussaaffiup, UNIO, killeqarfinnik nakkutilliisussatut sungiusartui marluk Nuup umiarsualiviani ippassap ullaap tungaani nikorfapput.

Taakku nunatsinni killeqarfimmik siullerpaamik misissuinissaminnut piareersimallutik, canadamiut aalisariutaataata tulaassai EU-mut ingerlateqqitassat misissussallugit.

Aalisakkanit nioqqutissiat aalisariutinit nunanit allaneersunit, soorlu Canadameersunit Ruslandimeersunillu nunatsinnut apriilip tallimaata kingorna tulaassaat, nunatsinni killeqarfittut akuerisaasumik misissuivinni, Nuummi Sisimiuniluunniit misissorneqartalerput.

Namminersorlutik Oqartussat EU-lu aalisakkanik niueqatigiinnissamik upernaaq isumaqatigiissuteqarput, uillut allallu aalisarnermi pisarisoortakkat aamma ilaallutik.

Danmarkimi Fødevareministeriaqarfik, Inuussutissalerinermut ministeriaqarfik, nunatsinni Namminersornerullutik Oqartussat qanimut suleqatigalugu isumaqatigiissusiorput.

Nioqqutissat, niueqatigiinnermi isumaqatigiissutaasut tassaapput aalisakkat aalisakkanillu nioqqutissiatut nerisassiat; raajat, aalisakkat uiluiillu, allallu pisarisuukkat nerisassiarineqarsinnaasut.

Assartuinermik sullivik Blue Water Shipping sapaatip akunnerani kingullermi ilisimatitsivoq canadamiut aalisariutaataat qaleralerivittalik Nuummut ataasinngornermi tikittussanngortoq. Taannaavorlu usiinik nunatsinni misissuiffigineqaqqaartussaq, EU-p killeqarfiani misissuiffigineqartutut pineqassalluni. Border Inspektion Postimit, BIP, misissuiffigineqarluni.

Aalisariutip usiisa uppernarsaatitai, soorlu usit pillugit TRACES-ikkut siumugaaq nassiunneqarsimasut, aamma akuersissutit peqqissutsimut tunngasut, killeqarfimmik nakkutilliisunut
aalisariutip usialinnginnerani tunniunneqareersimassapput, usiisalu misissulinnginnerini.

TRACES, Trade Control And Expert System, tassaavoq EU-kommissionip elektroniskimik akuersissutit pillugit paasissutissanik katersuiffia aamma uumasunik niueqateqarnermut atatillugu paasissutissanik katersuiffia, uumasunit nerisassianik eqqussuinermut aamma paasissutissanik katersuiffiusoq.

- Killeqarfimmik nakkutilliisut ulappuseruttorput. Qalerallit usingiarneqarput, taakku umiarsuup assartuutip sapaatip akunnerani matumani aallarutissavai, taama Stella Ege Kristensen, UNIO, uumasut nakorsaat oqaluttuarpoq.

Usit paasissutissartaat tamaasa eqqortumik nalunaarsorneqarsimanersut qulakkeerlugit misissorneqartussaapput, karsit qassiuneri pillugit nalunaarutigineqartut aamma qulakkeerlugit kisinneqartussaallutik.
- Usingiarneq nassiutassanillu poortuineq nakkutigineqarpoq. Karsit qassiuneri kisinneqarlutik, paasissutissallu allat nalunaarsorneqarlutik, Stella Ege Kristensen oqarpoq.

Qalerallit karsinut poortorneqarsimasut ilaat, taamungaannaq tiguseriarluni, qulaarlugit misissuiffigineqartarput. Soorlu karsit qulit nillissusiat, qanoq inneri, tikki mamassusaallu misissorneqartarput.

- Misissorneqartut ajunngippata EU-mut eqqunneqarsinnaanngortarput, Stella Ege Kristensen oqarpoq.

DanmarkimiInuussutissalerinermut ministeriaqarfimmeersut ukioq manna killeqarfimmik misissuisuupput. Killeqarfimmik Namminersorlutik Oqartussaneersut Sisimiuni Nuummilu aappagu misissuissapput, Danmarkimi Inuussutissalerinermut ministeriaqarfimmeersunit siunnersorneqartassallutik.

 

Assiliisoq: 

1) Assimi takuneqarsinnaapput Danmarkimi Inuussutissalerinermut ministeriaqarfimmeersut canadamiut aalisariutaannit qalerallit tulaanneqartut misissoraat.

2) Qalerallit karsinut poorneqarlutik tulaanneqartut Kalaallit Nunaannilu Uumasut Nakorsaqarfimmi Inuussutissalerinermilu Oqartussaaffimeersumit kisinneqarput.

3) Qalerallit karsinut poortorneqarsimasut ilaat, taamungaannaq tiguseriarluni, qulaarlugit misissuiffigineqartarput. Soorlu karsit qulit nillissusiat, qanoq inneri, tikki mamassusaallu misissorneqartarput.