Visit Greenland A/S ataatsimeersuaqqammerpoq

Marlunngorneq 24. juni 2014-imi nal. 10.00 Visit Greenland A/S Katuami Nuummiittumi nalinginnaasumik ataatsimeersuarpoq.

Ingerlatseqatigiiffiup ukiumoortumik nalunaarusiaata akuerineqarnissaa ilaatigut ullormi oqaluuserineqassalluni.

Ukiumut nalunaarusiami takuneqarsinnaavoq 2013-imi kr. 37.294-nik sinneqartoortoqartoq, angusarineqartullu naammaginartutut isigineqartut.

Visit Greenlandip 2013-imi pilersaarutaa annerpaaq tassaasimavoq Vestnorden Travel Mart, Københavnimi marloriarluni pisimasoq tassani Kalaallit Nunaat qaaqqusisuusarsimalluni Aaqqissuussineq Kalaallit Nunaata ilisimaneqarnerulernissaanik kissaateqarneq pissutigalugu pisisartussarsiorniarlunilu Kalaallit Nunaannut nooqqinneqarpoq.

Nittarsaassinersuarmut atatillugu taassuma annertusisamik suliniarfigineqarnera pisisartunik nutaanik siornamut naleqqiullugu 27%-it tungaannut amerleriaataasumik pissarsiviuvoq.

Tamatuma saniatigut suliffeqarfiit allat arlallit nittarsaassinersuup ingerlanerani imminnut nittarsaannissaminnut periarfissaqarsimapput, tamannalu nittarsaassinerup naammassinerani aningaasatigut iluanaarutaasimavoq.

Siulersuisunik taarsiineq

Ataatsimeersuarnermi Visit Greenlandip Kenneth Høegh siulersuisuni siulittaasunngornerani tikilluaqquaa kiisalu Karin Sinclair, Johanne Bech aamma Sakiko Daorana siulersuisuni ilaasortanngornerannut.

Tassunga atatillugu siulersuisunut siulittaasuusimasoq Karin Egede, kiisalu siulersuisunut ilaasortaasimasut Annette Links aamma Ole Andersen inuulluaqquneqarput.

Siulersuisunut ilaasortaq Poul Salik Jonas Hard qinigaaqqippoq.

"Naalakkersuisut sinnerlugit Visit Greenland A/S 2013-imi suleqatigiilluarsimanitsinnut qutsavigerusuppara. Visit Greenlandip ukiup ingerlanerani takornariaqarneq pillugu 2012-imut tunngaviusumik periusissiaq eqqarsaatigalugu suliatigut, angusarissaarluarnera nuannaarutigaarput. Siulersuisunut ilaasortat tunuartut tamatumunnga ineriartorsimanermut pitsaasumik suleqataalluarsimapput. Naalakkersuisut taakkuninnga nersorinninnerat sulinerannullu qujassutaat apuukkusuppara." Aleqa Hammond oqaaseqarpoq.