Finn Karlsen Kujataani angalavoq

Aalisarnermut, Piniarnermut Nunalerinermullu Naalakkersuisoq, Finn Karlsen, Kujataani ulluni arfilinilinni angalassalluni ippassaq, ataasinngornermi aallarpoq.

Innuttaasunik ataatsimiititsineq siulleq Alluitsup Paani ippassaq pivoq. Angalanissaata pilersaarutai naapertorlugit innuttaasunik ataatsimiititsinerit sisamat ingerlatissavai.

- Innuttaasut tikillugit oqaloqatiginissaat, naalaarnissaat isumasiornissallu pingaartitupilussuugakkit innuttaasunik taama amerlatigisunik ataatsimiititsisartoqassaaq, Finn Karlsen erseqqissaavoq.

Narsarmiijini, Aappilattumi Nanortalimmilu innuttaasunik ullumi, marlunngornermi ataatsimiitsitsisoqassaaq.

Savaatillit Peqatigiit Suleqatigiit ileqquusumik ukiumoortumik Narsami juunip 27-anni ataatsimeersuassapput, tassanilu Finn Karlsen oqalugiassaaq.

- Kujataani angalanissannut savaatillit ataatsimeersuarnissaannut peqataanissara pingaarnerpaavoq. Tamanna iluatsillugu sumiiffiit allat tikissavakka, soorlu aamma allanik oqaloqateqassasunga, Finn Karlsen oqarpoq.

Aalisarnermut, Piniarnermut Nunalerinermullu Naalakkersuisup, Finn Karlsenip ingerlatseqatigiiffik Arctic Prime Fisheries Qaqortumiittoq, Kommuni Kujallermi borgmesteri Jørgen Wæver Johansen, Qaqortumi Narsamilu aalisartut piniartullu peqatigiiffii ilaatigut ataatsimeeqatigissavai.

Naalakkersuisuni ilaasortaq Nuummut, ataasinngornermi, juunip 30-anni utissaaq.