”Kia Namminersorneq pillugu Inatsit ersigaa?"

Naalakkersuisut Siulittaasuata Naalakkersuisoqarfiata Namminersornerup eqqunneqarnerata ukiunik tallimanngortorsiorneranut atatillugu Ole Spiermann nammineq aalajangerlugu qulequtaq ”namminersorneq” aallaavigalugu tamanut ammasumik oqalugiariartornissaanut qaaqqusimavaa.

Ole Spiermann Kalaallit-danskit Namminersorneq pillugu Isumalioqatigiissitaanni naalagaaffiit inuiaallu akornanni inatsisitigut inissisimanerat pillugu suleqatigiissitami isumaqatigiinniarnermut peqataavoq.

Taamaasilluni Spiermannip Kalaallilt Nunaanni Namminersorneq pillugu Inatsisip pilersinneqarnera ilisimasaqarfigilluarpaa, taamanilu Københavnip Universitetiani naalagaaffiit inuiannullu inatsisit pisinnaatitaaffiillu pillugit professoriulluni.

Spiermannip aamma qulequttat aatsitassarsiornermut tunngassuteqartut sammisimavai.

”Kia Namminersorneq pillugu Inatsit ersigaa? Kalaallit-danskit Namminersorneq pillugu Isumalioqatigiissitaat pillugu unammilligassallu maanna piusut” eqqartuussissuserisumit Ole Spiermannimit. Nuummi Katuap Inersuaaraani ataasinngorneq juunip 23-ni nal. 19.30-21.30.