Kulturikkut Nersornaat tunniunneqarpoq

Kulturikkut Nersornaat Jørgen Kleemann, Atuagassiaq Kalaaleq aammalu Magnus Larsenimut tunniunneqarpoq

Inuiattut Ullorsiornermi juunip 21-ani 2014 Kulturikkut Nersornaat tunniunneqarpoq.

Ukioq manna Kulturikkut Nersornaat Jørgen Kleemann, Atuagassiaq Kalaaleq aammalu Magnus Larsenimut tunniunneqarpoq.

Jørgen Kleemann pillugu ilaatigut Naalakkersuisunut ilaasortaq Nick Nielsen imatut oqarpoq: 

-    -Nersornaaserneqartoq ukioqqortuujuvoq kulturikkut misigisaqarnikooqaluni misilittagarpassuaqarlunilu inuusuttuullunilu aamma isiginnaartitsisarnikuulluni. Nipilersorneq inuuneranut ilaavoq, ullumikkullu suli nipilersortarluni, ukiunilu kingullerni ilaatigut meeqqat atuarfianni meeqqat nuannareqisaannik kalattuunik nipilersortarluni. Kulturimi ingerlatsinermigut inuiaqatigiinni ataatsimoortitseqataavoq. Nuannarineqaqisunik nipilersortarnermigut aliikkusersuisarnermigullu nuannaartitsisarpoq aammalu kalaallit inuiaat nipilersuutaannik kalattuuinillu ingerlatitseqataalluni. Nipilersuutit assigiinngitsut atorlugit nipilersortarpoq, kaammattorneqaraangamilu nipilersorumasarluni.

Atuagassiaq Kalaaleq pillugu ilaatigut Naalakkersuisunut ilaasortaq Nick Nielsen imatut oqarpoq:

-    -Atuagassiaq pitsaalluinnartuuvoq, akisussaassuseqarnermik qaammarsaasarnermillu takutitsisoq, tassungalu peqatigitillugu kalaallit kulturikkut kingornussaat ingerlatiinnarlugit. Atuagassiap ataatsimut naleqartitagut minnerunngitsumillu  ataatsimut oqaatsigut atorlugit oqaluttuarisaanermi ulluinnarnilu inuunitsinni inuttut ataatsimoortippaatigut. Atuagassiaq allaaserinnittartunut soqutiginnittunullu allanut eqqarsaatiminnik, taalliaminnik atuartunut ingerlatitseqqeerusuttunut anersaartorfiusarpoq. Immikkut malugineqassaaq kalaallit oqaasii atorlugit atuagassiaasoq ukiorpassuarni ingerlanikuusoq sulilu soqutigineqariartuinnartoq.

Magnus Larsen pillugu ilaatigut Naalakkersuisunut ilaasortaq Nick Nielsen imatut oqarpoq: 

-    -30-t sinnerlugit saqqummersitaqarnikuuvoq, saqqummersitani arlalinni aaqqissuisuusarpoq atuakkioqataallunilu innuttaasuniillu atuakkiaminnik saqqummersitserusuttunit suli saaffigineqartaqaluni. Unammilligassaqaraluaqaluni saqqummersitsivimmik suli ingerlatsinermini uteriittuuvoq qasusuillunilu. Atuakkat assigiinngitsut saqqummersittarnikuuai, meeqqanut atuakkaniit atuakkanut upperisarsiornermik imaqartunut, oqaluttuarisaanermullu allaaserisanik ukiunit assigiinngitsuneersunit. Atuartartut pingaartumik ”Kitsissuarsuit inuilu”, nunaqarfiup pilersinneqarneraniit ukiunik 175-inngortorsiorneranut atatillugu atuakkiaa, kiisalu ”Aataa oqaluttuarit”,  piniartutut ulluinnarni inuuneq kiisalu piniartut uumasut pinngortitarlu pillugit ilisimasaat pillugit Pavia Nielsenip atuakkiaa nuannaraat. Atuakkiornermik ilisimasaqarluarpoq tusarnaarsinnaassuseqarlunilu, tassungalu peqatigitillugu isornartorsiuisarluni.

Naalakkersuisut sinnerlugit Naalakkersuisunut ilaasortaq Nick Nielsen diplomimik nersornaatillu aningaasartaanik tunniussivoq.

 

Nick Nielsenip Oqalugiaataa.


Assilisat takukkit.


Paasissutissanik amerlanerusunik perusukkuit attavigiuk:

AC Fuldmægtig Pia Lynge, 345706