Ataatsimeeqatigiilluarneq siunissami suleqatigiinnerunissamik isumalluarfiuvoq

19. juni 2014 Naalakkersuisoq Martha Lund Olsen aamma Inatsiseqarnermut ministeri Karen Hækkerup ataatsimeeqatigiipput, inatsisinut tunngassutillit oqaluuserigalugit. Ataatsimiinnermi oqaloqatigiilluarfiusumi ilaatigut sammineqarput pineqatissiinerup saniatigut akerleriittoqarnerani siunnersuisoqatigiinnik misiligutaasumik pilersitsinissaq.

Aammali meeqqanik video atorlugu killisiuisinnaaneq, angerlarsimaffigisami pineqaatissiinermik atuineq innuttaasullu politiinik iluarisimaarinninnerannut tunngasut oqaluuserineqarput.

Ataatsimeeqatigiinneq pissarsiaqarfiulluartoq siunissami suleqatigiilluarnissamik isumallualersitsivoq.

”Ataatsimiinneq pitsaasoq angusaqarfiulluartorlu inatsiseqarnermi apeqqutinik Kalaallit Nunatsinnut attuumassutilinnik pingaarutilinnillu oqaloqatigiiffigaarput. Inatsiseqarnermut ministeri Karen Hækkerup suliassat Nunatsinni massakkut aallutagut pillugit ilisimatinneqarpoq, aammalu anguniagassat suleqatigiinnermilu periutsit nutaat isumaqatigiissutigaagut. Taamaaliornikkut Kalaallit Nunaanni suliassatut pingaarnertut isigisatta pimoorunnerullugit aallunnissaat isumannaarsinnaavarput”, Martha Lund Olsen ataatsimiinnerup kingorna oqarpoq.