Aalisarnermut ministerit naapittut

Aalisarnermut ministerit Atlantikup avannaaneersut Ilulissani ataatsimiissapput.


Norgip, Ruslandip, Islandip, Savalimmiut nunattalu aalisarnermut ministerii, aamma EU-p Canadallu sinniisui Ilulissani ulluni pingasuni ataatsimiinnissartik, Hotel Arcticimi marlunngornermi juunip 17-inianni aallartissavaat. Nunarput ataatsimiinnissamut aggersaasuuvoq.

Ukioq manna ataatsimiinnerup qulequtaa tassaavoq silap pissutaata allanngornera.

- Isumaqarpunga Atlantikup avannaani aalisakkat silap pissusaata allanngornerinik sunnigaanerat  nalilersorlugu misissorneqartariaqartoq, Aalisarnermut, Piniarnermut Nunalerinermullu Naalakkersuisoq, Finn Karlsen oqarpoq. Naalakkersuisullu erseqqissarpaa Atlantikup avannaani isumalluutinik ataatsimoorluni ilisimatusarnerup nakkutilliinerullu nukittorsarneqarneratigut qulakkeerneqarsinnaasoq, aalisarnermut nutaanut naleqqussarnerup ingerlareersunillu naleqqussarnerup sukkasuumik allanngornernut malinnaasinnaasoqarsinnaalluni.

Aalisarnermut ministerit Atlantikup avannaaneersut ataatsimiinnerminni Atlantikup avannaata imartaa ataatsimut soqutigisaqaqatigiittut oqaluuserisarpaat. Ataatsimiinneq aalajangersaaffiuneq ajorpoq. Aalisarnerli pillugu isummaminnik saqqummiuffigilluartarpaat.

Ataatsimiinneq ataatsimut nalunaaruteqarnermik naggaserneqassaaq, nunat peqataatitaqartut aalisarneq pillugu isummaminnik saqqummiussissallutik.

Tusagassiorfiit tusagassiortunik Hotel Arcticimi sisamanngorpat nalunaaqutaq 17.30 katersortinneqarnissaannut aggersarneqarput.