Maniitsumi ataatsimiitsitsineq soqutigineqarluartoq

Naalakkersuisut Siulittaasuat Aleqa Hammond siuttoralugu Naalakkersuisuni ilaasortat arfineq-marluk Maniitsumi Hotel Maniitsup inersuaani ataasinngornermi 9. juni 2014 innuttaasunik ataatsimiitsitsipput. Innuttaasunik ataatsimiisitsineq ornigarneqarluartoq, inunnit 100-t missaanniittunit peqataaffigineqarpoq.

Ataatsimiinneq aallarnerlugu Aleqa Hammondip Naalakkersuisut suliaat ukiunilu tulliuttuni suliassatut pilersaarutaat ilisimatitsissutigai. Naalakkersuisuni ilaasortat oqartussaaffimminni suliarisatik aamma ilisimatitsissutigaat.

Saqqummiussinerit kingorna peqataasunit Naalakkersuisunut apeqquteqarusuttoqarluarpoq. Naalakkersuisoqarfinnut assigiinngitsunut apeqqutigineqartut assigiinngisitaarluartut ilaatigut ukuupput:

- Ilinniartitaanermut tunngatillugu 11. klassit eqquteqqinneqarsinnaannginnerat pillugu apeqqut

- Suliffiit Maniitsuminngaanniit illoqarfinnut allanut nuunneqarsimasut

- Tuttunniarnissamut umimmanniarnissamullu tunngatillugu tusarniaaneq pillugu apeqqutit

- Ilinniartitaanermi kalaallisuinnaq oqaasillit ilinniarsinnaanerminnut periarfissaat pillugit apeqqut

Naalakkersuisut Siulittaasuat Aleqa Hammond:

"Innuttaasunik ataatsimiitsitsinitsinnut takkuttorpassuaqarnera nuannaarutigaara peqataasullu assigiinngitsunik suliatsinnullu attuumassuteqarluartunik apeqquteqaqattaarput, Naalakkersuisuni ilaasortat peqataasut akissuteqarfigisinnaasaannik. Uanga Naalakkersuisunilu ilaasortat innuttaasut ataatsimiisitsinermut peqataasut soqutiginnilluarlutik apeqqutissaqarluarlutillu takkunnerat qujassutigaarput, ataatsimiitsitsinerup takutilluarmagu Maniitsumi innuttaasut sunik paaserusutaqarlutillu eqqarsaateqarnersut."

Ataatsimiitsitsinermit assilisat takukkit.

Attavissaq: Elisabeth Ravn Johansen, Naalakkersuisut Siulittaasuata Allattaa, mobil: +299 486408