Nunarput 14-inik pujortarunnaarnissamut siunnersortitaarpoq

Sapaatip akunnera 22-mi – pujortarfiunngitsumi pujortarunnaarnissamut siunnersortit nutat 14-nit ilinniarput. Innuttaasut suleqatillu pujortarunnaar¬nissamut ikiornissaannut piareerput.


Pujortarunnaarneq artornarsinnaavoq, aamma pujortarunnaarnerup attanniarnera artornarsinnaavoq. Kisianni pujortarunnaarniarnermut ikiorserneqaraanni iluatsinnissaanut periarfissaqarnerussaaq. Pujortarunnaarnissamut siunnersortinit ilinniarnerminnit naammasseqqammersunit ikiorneqarnissaq periarfissaalerpoq.

Sapaatip akunnerani 22-mi Nuummi nunamit tamarmit 14-nik peqataasoqarluni pujortarunnaarnissamut siunnersortitut ulluni pingasuni pikkorissartoqarpoq. Tassani sammisanik ilinniartitsisoqarpoq soorlu pujortarnerup timimut sunniuteqartarnera, pinngitsuuisinnaannginneq aamma kingunerlutsitsinerit. Peqataasut  pujortarunnaarnermi peqqissutsimut pitsaaqutaasut siunnersuinermilu piginnaanerit aamma ilikkarpaat, eqimattanut mikisunut pujortarunnaarnissamut pikkorissarnerit ingerlannissaannut maannakkut piareerput.

Peqataasut pujortarunnaarnerup peqqissutsimut pitsaaqutai aamma pujortarnerup timimut sunniutigisartagai pillugit sammisarpassuarnut alapernaallutillu apererusussuseqarput pikkorissarnermullu peqataalluarlutik. Pujortarunnaarnermut tunngatillugu qanoq pitsaanerpaamik ikiuussinnaaneq siunnersuinerlu pillugit oqallilluarneqarluni.

”Periutsip paasisaqarfiginera pitsaasuusimavoq, pujortarnermut, pujortanngikkaluarluni tupap pujuanik najuussuinermut tunngatillugu  aamma pujortarunnaarluni qanoq pitsaatigisoq pillugu paasissutissat kingullerpaat pissarsiaraakka”, peqataasut ilaat Pitsaaliuinermut siunnersorti aamma Multicenterimi Sullissivimmi pisortaq, kommune Kujallermi, Narsameersoq, Bolethe Stenskov oqaluttuarpoq.

Peqataasut avannaani Upernavimmiit kujataanillu Nanortalimmeerlutik, aamma suliffeqarfinnit kommuniniillu peqataasoqarpoq. Taamaalilluni maanna nunap ilaani  arlalinni pujortarunnaarniarnermut siunnersorteqalerpoq.

Pikkorissareernerup kingorna peqataasunit arlallit pikkorissarnermit angerlarunik sumik aallartitsisanerlutik pilersaaruteqalereerput. Suliffimmi suleqatinut kommunimilu innuttaa­­sunut pujortarunnaarnissamik pikkorissaanerit ingerlanneqarnissaat pilersaa­rutigineqarput. Aamma peqataasut arlallit meeqqat inuusuttullu pujortarunnaar­nis­samik ikiorniarlugit ukkanniarpaat.

”Innuttasut amerlanerpaat pujortarunnaarsinniarlugit sulinerup nanginneranut pikkorissarneq atussavara. Sullinniakkakka inuusuttuussapput, taakkuami meeqqani inuusuttunilu pujortanermik siammartereqataasarmata, inuusuttut angajulliunerusut  ”sunnertiaatsutut/torraasutut” suli isigineqartarmata”, Bolethe Stenskov oqaluttuarpoq.

Pujortarunnaarnissamut siunnersortitut eqimattanut mikisunut pujortarunnaarnissamik pikkorissarnerit ingerlanneqarsinnaapput. Pujortarunnaarnissamut pikkorissarnerit piffissami sapaatip akunneri arfinillit missaanni ingerlasarput. Naapinnerni siullerni pujortarunnaarnissaq piareersarneqassaaq. Tamatuma kingorna pissutsit aqunnissaannut nangittooratarsinnaanermut aarlerinartoqarnerani ikiuisoqartassaaq aamma  pujortarunnaarneq attatiinnarniarlugu  ikiuisoqartassaaq.

Pujortarunnaarnissamut siunnersuinermut pikkorissarneq Kræftens Bekæmpelse Danmarkimit ingerlanneqarpoq aamma CSR Greenlandip aamma Peqqissutsimut Attaveqarnermullu Naalakkersuisoqarfiup akornanni suleqatigiinnissamik isumaqatigiissutip ilaatut neqeroorutigineqarluni.


Annertunerusumik paasissutissat pillugit atassuteqarfik:

Peqqissutsimut sulianut siunnersorti Nadja Frederiksen oqarasuaammut + 299 34 66 76 imaluunniit e-mailimut nafr@nanoq.gl