Australiamiut Aallartitaat tikeraarpoq

Naalakkersuisut Siulittaasuata Aleqa Hammondip Australiamiut Kunngeqarfimmi Danmarkimi aallartitaat Damien Miller, ulluni makkunani Nunatsinni tikeraartoq, ullumi naapippaa.

Naalakkersuisut Siulittaasuat ullumi juunip sisamaani Australiamiut Kunngeqarfimmi Danmarkimi aallartitaannik Damien Millerimik, piffisami 2.-5. juni, Nunatsinni tikeraartumik naapeqateqarpoq.

Naapateqatigiinnermi Naalakkersuisut Siulittaasuata Damien Millerillu Australiap Nunat-talu attaveqatigiinnerat, kiisalu Nunatta Australiallu akornanni sutigut iluaqutaanerpaasinnaasunik suleqatigiinnerusinnaanerat eqqartorpaat.

Nunarput Australiami soqutigineqaqaaq. Damien Millerip 2013imi siullermeerluni Nunarput tikeraarpaa, maannalu tikeraaqqikatareerluni. Australiamiunut aatsitassarsiorneq Australiamiullu suliffeqarfiutaat Nunatsinniittut pingaaruteqarput. Australiamiut aallartitaata aamma nammineerluni inuttut Nunarput soqutigaa, Australiamiut aallartitaattut nunap inoqqaavinit kingoqqisuni siullersaanini ilaatigut pissutigalugu, nunaqqatiminut maligassiuisuugami kiisalu Nunatsinni Namminersorlutik Oqartussat misilittagaat isumassarsiorfigisinnaagamigit.

2014imi februaarip qaammataani Inuussutissarsiornermut Suliffeqarnermullu Naalakkersuisoq Inatsisartut Aatsitassanut Ataatsimiisitaliaani ilaasortat peqatigalugit, ilaatigut Australiamiut uranimik piiaanermik misilittagaannik ilinniarfiginiarlugit Australiamut tikeraarput. Australiami aatsitassarsiorneq pingaarutilerujussuuvooq Australiallu tunisaasa 10%-iat aatsitassarsiornermeersuupput.

Aallartitap Australiami aatsitassarsiornermi misilittakkat, ilaatigut Kinamiunik aningaasaliisartunik qanimut suleqateqarluni ingerlanneqartut, kiisalu Australiami nunap inoqqaavi pillugit politikki oqaluttuarai. Sapaatip akunnerani matumani (27. maj–3. juni) Australiami ukiumoortumik innuttaasut saammaateqatigiinnersiorput, pisullu tamatuma Australiami nunap inoqqaavisa oqaluttuarisaanerminnik eqqaamanninnissaat siunissamullu innuttaasut ingerlaqatigiinnissaat qulakkiissavaa. 27. maj ulloq tassaavoq 1967-imi inuiaat kisinneqarneranni nunap inoqqaavisa akuerisaanerannik nalliuttorsiorfik, taamanilu nunap inoqqaavi sinnerlugit inatsisinik akuersisinnaaneq akuerineqarpoq. Ulloq 3. juni tassaavoq, Australiami Eqqartuussiviit Qullersaasa 1992imi Australiami nunap inoqqaavisa nunaminnut immikkut ittumik attaveqarnerat pillugu aalajangiunneqarneranik kiisalu nunap inoqqaavinut nunamik piginnittussaanermut isumaqatigiissuteqarnissamik ammassinermik malunnartitsineq.

Naalakkersuisut Siulittaasuat Aleqa Hammond ataatsimeereernerup kingorna ima oqarpoq:

”Australia Nunatsinnut isumassarsiorfissaavoq pingaaruteqartoq, Australiallu tungaanit aamma soqutiginnittoqarmat ajunngilluinnarpoq.

Ukiut makkua immikkut pingaaruteqarput, Nunatta aningaasaqarnikkut aalisarnermik takornariaqarnermillu tunngaveqarnerata suliassaqarfinnik isertitaqarfiusinnaasunik allanik, aatsitassiorneq ilanngullugu, annertusarnissaata qulakkeernissaa pissutigalugu.

Aatsitassarsiornermi Australiap sorpassuartigut ingerlatsineq pitsaanerpaaq takutissimavaa, tamannalu uagut isumassarsiorfigisinnaavarput.

Suleqatigiissutigisinnaasatta allat itisilernerunissaat neriuutigaara, aallartitallu sutigut tamatigut suleqatigiinnissamut periarfissat annertusarnissaannut tunngatillugu sulissuteqarniarnera nuannaarutigaara, aatsitassarsiornerinnaanngitsumi, kisiannili aamma ilinniartitaanerup tungaatigut.”


Aleqa Hammond

Naalakkersuisut Siulittaasuat



Paasissutissanik allanik pisoqarusuttoqarpat attavigineqarsinnaavoq:

Pisortaq Kai Holst Andersen, Nunanut Allanut Pisortaqarfik, mobil: +299553331