Kim Kielsen FN-imi oqalliseqataavoq

Kim Kielsen nungusaataanngitsumik nukissiuuteqarneq pillugu nunani tamalaani oqallittarfimmi


FN-ip generalsekretæria Ban Ki-moon naalagaaffinni inuussutissarsiornermilu aqutsisunik, kiisalu inuiaqatigiinni inuinnarnit sinniisunik nunarsuarmi nungusaataanngitsumik nukissiuuteqarnermik suliaqarnerup annertunerulernissaa sulissutiginiarlugu FN-ip New Yorkimi qullersaqarfiani oqallinnissamut annertuumut qaaqqusivoq.

Tassalu Avatangiisinut Pinngortitamullu Naalakkersuisoq oqallinnerup ulluata aappaanni, sisamanngornermi juunip ulluisa tallimaanni nukissiuutinik pitsanngorsaanissaq siunnerfigalugu oqallittoqarneranut peqataalerpat, nunarsuarmi inuit tamarmik tusarnaaqataassapput. Ukioq manna siusinnerusukkut generalsekretærip Ilulissanut tikeraarneranut atatillugu peqataanissamut aammalu Kalaallit Nunaanni misilittakkat pillugit oqaluttuarnissamut Kim Kielsen Ban Ki-moonimit immikkut qaaqqusissummik pissarsivoq.

FN-ip ”Tamanut nungusaataanngitsumik nukissiuuteqarnissaq pillugu oqalliffik” (Sustainable Energy for All Forum) siulliup FN-imit ingerlanneqarnissaa ataatsimiinnermut tunngaviuvoq, tassanilu nunarsuarmi innuttaasut nukissiuutinik nungusaataanngitsunik atuinerisa annertunerulernissaata qulakkeerneqarnissaanik taperserneqarnissaa siunertarineqarpoq. Tassalu oqalliffimmi aqutsisut, nukissiuutinik pitsanngorsaanerit nukissiuutillu ataavartut siuarsaaffigineqarnissaannik soqutigisaqartut katersuutsinneqassapput.

Oqalliffimmi FN-ip ukiuni qulini tulliuttuni nukissiuutinik ataavartunik sammisaqarnissaata aalajangiunneqarneranik malunnartitsisoqarnissaata saniatigut, siunissami qanittumi nunarsuarmi naalagaaffinni aqutsisunik Ban Ki-moonip silap pissusia pillugu immikkut ittumik ataatsimeersuartitsinissaa, 23. september 2014-imi pisussaq sioqqullugu tunngavissiuinissaq periarfissanillu misissuinissaq siunertarineqarpoq. Septembarimi ataatsimiinnermi tassani Naalakkersuisunut siulittaasoq Aleqa Hammond peqataassaaq.

Oqalliffimmut tassunga pilersaarut uani takuneqarsinnaavoq: http://www.se4all.org/se4all-forum/

 

Annertunerusumik paasisaqarusunnermi attaveqarfissaq:

Naalakkersuisup allattaa Karen Motzfeldt

Mobil: (+299) 562450, email: karm@nanoq.gl

 

Imaluunniit:

Pinngortitamut, Nukissiuuteqarnermut Silallu Pissusianut Immikkoortortaqarfimmi pisortaagallartoq

Karen Anne Arleth

Mobil: (+299) 562450, email: knar@nanoq.gl